ह्वाइट हाउस अन्तिम चारमा

धनगढी । काठमाडौंको हिमालयन ह्वाइट हाउस धनगढीमा जारी निष्ट कलेज लिटल फ्लावर प्रिमियर लिग क्रिकेटको सेमिफाइनलमा प्रवेश गरेको छ ।

आइतबार भएको क्वाटरफाइनलमा शारदा माविलाई ६ विकेटले पराजित गर्दै ह्वाइट हाउस सेमिफाइनलमा पुगेको हो ।

ह्वाइट हाउस सेमिफाइनल पुगेसँगै प्रतियोगिताको सेमिफाइनल समीकरण समेत पुरा भएको छ । ह्वाइट हाउससगै नोवेल एकेडेमी कञ्चनपुर, शारदा विद्या निकेतन धनगढी र लिटल फ्लावर स्कुल सेमिफाइनलमा पुगेका छन्।

संघीय प्रहरी ईकाई कार्यालयको खेल मैदानमा टस जितेर पहिले ब्याटिङ गरेको शारदाले १९ ओभर ५ बलमा अलआउट हुँदै १ सय २ रन बनाएको थियो ।

उसका लागि सुनिल चन्दले २६ र लक्ष्मण कठायतले ३२ रन बनाए । ह्वाइट हाउसका विक्रम ठगुन्ना, नारायण जोशी र रामसुरत यादवले २/२ विकेट लिए ।

शारदाले दिएको १ सय ३ रनको लक्ष्य ह्वाइट हाउसले ११ ओभर ५ बलमा मात्र ४ विकेट गुमाएर पुरा गर्यो ।

ह्वाइट हाउसका लागि सुदिप बस्नेत र गजेन्द्र बोहराले ३०/३० रन बनाए । शारदाका श्यामसुन्दर साउदले ३ विकेट लिए ।