एजेन्सी । केलियन एम्बाप्पेको ह्याट्रिकको सहयोगमा पेरिस सेन्ट जर्मेन (पीएसजी)ले च्याम्पियन्स लिग फुटबलमा शानदार जित निकालेको छ ।
मंगलबार राति भएको खेलमा लिग वान च्याम्पियन पीएसजीले बेल्जियमकाे क्लब ब्रुगिसलाई ५–० गोल अन्तरले हराएको हो ।
बैकल्पिक खेलाडीको रुपमा दोस्रो हाफमा मैदान छिरेका एम्बाप्पेले ह्याट्रिक गर्न सफल रहे । बाँकी दुई गोल ईकार्डीले गरे ।
एम्बाप्पेले २० बर्ष ३ सय ६ दिनमा च्याम्पियन्स लिगमा १५ गोल गर्ने सबैभन्दा युवा खेलाडी बनेका छन् ।
एन्जल डी मारियको पासलाई सदुपयोग गर्दै खेलको सातौ मिनेटमा ईकार्डीले पीएसजीलाई अग्रता दिलाएका थिए । तर दोस्रो गोलका लागि पीएसजीले लामो समय प्रतिक्षा गर्नुपर्यो ।
६१ औ मिनेटमा पीएसजीका लागि एम्बाप्पेले दोस्रो गोल गरे । त्यसको दुई मिनेटपछि ईकार्डीले ब्यक्तिगत दोस्रो गोल गर्दै पीएसजीलाई ३–० ले अघि बढाए ।
डी मारियाको क्रसलाई सदुपयोग गर्दै ७९ औ मिनेटमा एम्बाप्पेले पीएसजीलाई ४–० ले अघि बढाए । ८३ औ मिनेटमा एम्बाप्पेले ह्याट्रिक पुरा गरेका थिए ।
समूह एको खेलमा जित सहित पीएसजीले नकआउट चरणको नजिक लम्किएको छ । समूहको शीर्ष स्थानको पीएसजीले ९ अंक जोडेको छ । क्लब ब्रुगिस २ अंक सहित तेस्रो स्थानमा छ ।
