एजेन्सी । म्यान्चेष्टर युनाईटेडका फरवार्ड मार्कोस रासफोर्डले आफुहरु तीन अंकको हकदार रहेको बताएका छन् ।
युनाईटेडका युवा स्टार रासफोर्डले प्रिमियर लिगको लिभरपुलविरुद्व आफुहरु जितको हकदार रहेको दाबी गरेका हुन् ।
'हामी तीन अंकको हकदार थियौ । यो अगाडी बढ्ने राम्रो अवसर थियो ।' रासफोर्डले भनेका छन् ।
आईतबार राति भएको खेलमा युनाईटेडले लिभरपुलसंग ओल्डट्राफोर्डमा १–१ गोलको बराबरी खेलेको थियो ।
डिफेन्सको उत्कृष्ट नमुना प्रस्तुत गर्दै युनाईटेडले लिभरपुललाई रोक्न सफल देखिने लक्षण देखाएको थियो ।
तर खेलको अन्तिम समयमा लिभरपुलका एडम लालनाले गोल गर्दै खेल बराबरीमा ल्याएका थिए ।
खेलमा अग्रता युनाईटेडले रासफोर्डको गोलबाट लिएको थियो ।
रासफोर्डले लिभरपुलविरुद्वको खेलले युरोपा लिगमा टिमको मनोबल उच्च हुने बताएका छन् ।
अन्तराष्ट्रिय विश्रामबाट फर्कदै युनाईटेडले लिभरपुललाई घरेलु मैदानमा आतिथ्यता प्रदान गरेको थियो ।
तर वैकल्पिक खेलाडीको रुपमा मैदान छिरेका लालनाले लिभरपुललाई अंक दिलाउन सफल रहे । बराबरीसंगै लिभरपुल लगातार १७ खेलमा अपराजित रहन सफल भएको छ ।
'समग्रमा मैले निराश महशुश गरेको छु ।' रासफोर्डले भनेका छन् ।
'मलाई लाग्छ हामी तीन अंकको हकदार थियौ । हामीले राम्रो प्रर्दशन गरेको भन्न सक्छौ । खेलको अन्तिममा उनीहरु बराबरी र जितका लायक थिएनन् ।' उनले थपे, 'हामीले दुई अंक गुमाएका छौ । एउटा ठुलो खेलमा राम्रो अवसर थियो । तर अघि बढ्न पर्छ ।'
युनाईटेड युरोपा लिग खेल्न सर्वियाको भ्रमण गर्दैछ ।
खेलाडीहरु एन्थोनी मार्टियल, पाउल पोग्वा र जेसे लिङ्गार्डको आगमनले युनाईटेड उत्साहित देखिएको छ ।
