काठमाडौं। बंगलादेश राष्ट्रिय फुटबल टोली दुईवटा फिफा मैत्रीपूर्ण खेल खेल्न बुधबार दिउँसो काठमाडौं प्रस्थान गरेको छ।
विदेश भ्रमणअघि पत्रकार सम्मेलन गर्नु बंगलादेश फुटबलको संस्कृति जस्तै थियो। तर, यसपल्ट टोलीका मुख्य प्रशिक्षक हाभियर क्याब्रेराको प्रभावमा बंगलादेश फुटबल फेडेरेसन (बीएफए) नयाँ बाटोमा हिँडिरहेको छ। औपचारिक पत्रकार सम्मेलन नगरी नै राष्ट्रिय टोली देश छोडेको छ।
बीएफए स्रोतका अनुसार प्रशिक्षकको इच्छा र योजनाअनुसार बन्द प्रशिक्षणजस्तै औपचारिक पत्रकार सम्मेलन पनि आयोजना नगरिएको हो। सामान्यतया राष्ट्रिय टोली, यु–१५ साफ वा उमेर समूहका आमन्त्रित प्रतियोगिताका लागि बीएफए भवनमा पत्रकार सम्मेलन हुने गर्छ। तर, हालैका दिनमा एएफसी यु–२३ एसियन कप छनोट र नेपालमा हुने फिफा मैत्रीपूर्ण खेलका लागि कुनै औपचारिक पत्रकार सम्मेलन आयोजना गरिएन।
गत सोमबार राष्ट्रिय फुटबल टोलीको प्रशिक्षण सुरु हुनुअघि प्रशिक्षक क्याब्रेरा र तपुले मिडियासँग केही मिनेट कुराकानी गरेका थिए। त्यो पनि कोभिड कालमा जस्तै केही फिटको दूरी राखेर। पत्रकारहरू रेलिङको एकातिर र प्रशिक्षक तथा खेलाडीहरू एथलेटिक्स ट्र्याकमा उभिएका थिए।
बंगलादेशका प्रशिक्षक क्याब्रेरा र डिफेन्डर तपुले मिडियासँग निकै दूरी राखेर कुराकानी गरे। टोलीले अन्तिम तयारी गरेर देश छोड्ने दिन वा अघिल्लो दिन पत्रकार सम्मेलन हुने गर्थ्यो। ती सम्मेलनमा टोली छनोट, खेलको शैली र लक्ष्यबारे प्रश्नहरू सोधिन्थे। तर, नेपाल भ्रमणअघि क्याब्रेराले त्यस्तो अवसर मिडियालाई दिएनन्।
अन्तिम टोलीको घोषणा बिहान ११ बजे बीएफएको फेसबुक पेजमा पोस्ट गरिएको थियो। राष्ट्रिय टोलीको घोषणा महत्त्वपूर्ण विषय हो र मिडियालाई पहिले जानकारी गराउनुपर्ने भए पनि बीएफएले फेसबुक पेजलाई प्राथमिकता दिएको छ। राष्ट्रिय टोलीको घोषणा देश छोड्नुअघि फेसबुकमा गरिएको थियो भने यु–२३ टोलीको घोषणा बहराइन पुगेको एक दिनपछि गरिएको थियो।
बंगलादेशको टोली:
गोलरक्षक: सुजन होसेन, मितुल मार्मा, पप्पु होसेन
डिफेन्डर: मेहेदी हसन, रहमत मिया, तपु बर्मन, ताज उद्दिन, अब्दुल्लाह ओमर, तारिक काजी, इसा फयसाल, साद उद्दिन
मिडफिल्डर: मोहम्मद हृदय, जमाल भुँइया, पापोन सिंह, सोहेल राना (सिनियर), सोहेल राना, शाह काजेम
फरवार्ड: आरिफ होसेन, शाहरियार इमोन, राकिब होसेन, फयसाल अहमद, मोहम्मद इब्राहिम, सुमन रेजा
