काठमाडौं । नेपाल क्रिकेट संघ (क्यान) का अध्यक्ष चतुर बहादुर चन्दले पारस खड्कालाई कप्तानको राजिनामा फिर्ता गर्न आग्रह गरेका छन् ।
महिला क्रिकेटको पहिलो फ्रेन्चाईज लिग वुमेन च्याम्पियन्स लिग (डब्लुसीएल) को उद्घाटन समारोहमा बोल्दै चन्दले कप्तान पारसलाई राजिनामा फिर्ता लिन आग्रह गरेका हुन् ।
पारसले अचानक कप्तानीबाट राजिनामा दिँदा क्यानका पदाधिकारीहरु आश्चर्यमा परेको समेत चन्दले बताए ।
'कप्तानबाट पारसको राजिनामाले म लगायत क्यानका सबै साथीहरु आश्चर्यचकित भएका छौं । पारस एक सफल र उत्कृष्ट कप्तानसँगै खेलाडी समेत हुन्,' चन्दले भने, 'उनको योगदानले नै नेपाल क्रिकेट यहाँ सम्म आइपुगेको हो । हामी लगायत सारा क्रिकेट समर्थक नै उनको निर्णयबाट चकित छौं । उनलाई आफ्नो निर्णय फिर्ता लिन आग्रह गर्छौं । यसबारे हामी छलफल समेत गर्नेछौँ ।'
पछिल्लो १० वर्षयता क्रिकेट टिमको कप्तानी गरिरहेका पारसले मंगलबार कप्तानबाट राजिनामा दिएका थिए ।
यस्तै चन्दले साढे तीन वर्ष लामो निलम्बनबाट मुक्ति पाएको क्यान सबैको सहयोगमा अगाडी बढ्ने बताए ।
'क्यानको निलम्बन फुकुवामा सबै खुसी छौँ र आशा छ सबै सरोकारवालाले क्यानलाई सहयोग गर्नु हुनेछ,' चन्दले भने ।
आईसीसीले क्यानको निलम्बन सशर्त फुकुवा गरेको हो । दुबईमा सोमबार सम्पन्न आईसीसीको बैठकले सशर्त क्यानको निलम्बन फुकुवा गर्ने निर्णय गरेको हो । तर, आईसीसीले शर्तहरु भने खुलाएको छैन।
-1747226778.jpeg)
