दार्चुला । महाकाली-०१ र छपारी क्लब दार्चुलामा जारी पहिलो संस्करणको मालिकार्जुन प्रिमियर लिग (एमपीएल) क्रिकेटको सुपर आठमा प्रवेश गरेका छन् ।
सकार क्रिकेट मैदानमा मंगलबार भएको खेलमा महाकालीले सकारलाई ४४ रनले पराजित गर्दै सुपर आठमा स्थान सुरक्षित गरेको हो ।
महाकालीले दिएको १ सय १८ रनको लक्ष्य पछ्याएको सकारले १४ ओभरमा ४८ रनमा अल आउट भयो । उसका खगेन्द्रले सर्वाधिक १७ रन बनाए । यस्तै पारस धामीले १३ र जनक भट्टले १२ रन बनाउनु बाहेक अन्य खेलाडीले दोहोरो अंक छुन सकेनन् । महाकालीका नरेन्द्र महराले ३ तथा रोशन धामीले २ विकेट हात पारे ।
यसअघि टस जितेर ब्याटिङ गरेको महाकालीले १४ ओभर ५ बलमा पुरै विकेट गुमाएर १ सय १७ रन बनाएको थियो । उसका नरेश धामीले सर्वाधिक ३१ रन जोडे । यस्तै हमेश धामीले १३ तथा रोशन धामीले १० रन बनाउँदा अन्य खेलाडीले सास्तीमा पेभिलियन फर्किए । सकारका प्रदीपले ४ विकेट हात पार्दा पारस धामी र खगेन्द्रले समान २/२ विकेट हात पारे ।
अर्को खेलमा छपारीले सकारलाई ८५ रनले पराजित गर्दै सुपर आठमा स्थान बनायो । १ सय ९१ रनको फराकिलो लक्ष्य पछ्याएको सकारले १५ ओभरमा अल आउट हुँदै मात्र १ सय ५ रन बनायो । उसका केशब धामीले सर्वाधिक ३० रन जोडे । यस्तै राकेश धामीले १८ र रमेश धामीले १३ रन बनाउनु बाहेक अन्य खेलाडीले दोहोरो अंक छुन सकेनन् । छ्पारीका बिरेन्द्र कार्कीले ३ तथा पारस र दिनेश धामीले समान २/२ विकेट हात पारे ।
यस अघि टस जितेर ब्याटिङ गरेको छ्पारीले निर्धारित १५ ओभरमा ४ विकेट गुमाएर १ सय ९० रन बनायो । उसका ओपनर प्रेम कार्की र दिन्सेह कार्कीले क्रमश ६१ र ७१ रनको अर्धशतकीय पाली खेले । सकारका राकेशले २ विकेट हात पार्दा केशब र धिरेन्द्रले समान १/१ विकेट हात पारे ।
दिपेन्द्र धामी स्मृति प्रतिष्ठान र शान्तिदिप युवा क्लबको आयोजनामा जारी प्रतियोगितामा २४ टिमको सहभागिता रहेको छ । नकआउटका आधारमा जारी प्रतियोगिताको विजेताले १ लाख ११ हजार १ सय १ रुपैयाँ पाउने छन् । यस्तै उपविजेताले ४४ हजार ४ सय ४४ रुपैयाँ पाउने छन् ।
प्रतियोगिताको सर्वोकृष्ट खेलाडीले ६ हजार ५ सय नगद प्राप्त गर्दा उत्कृष्ट बलर, ब्याट्सम्यान र उदयमान खेलाडीलाई २ हजार ५ सय प्रदान गरिने आयोजकले जनाएको छ ।
-1747226778.jpeg)
