काठमाडौं । विश्वकप फुटबलको छनोट खेल खेल्न नेपाली राष्ट्रिय फुटबल टोली आज (मंगलबार) अस्ट्रेलियाको राजधानी शहर क्यानबेरा पुगेको छ ।
सिड्नीमा करिब एक साता लामो अभ्यासपछि राष्ट्रिय फुटबल टोली मंगलबार दिउँसो सडक मार्ग हुँदै करिब चार घन्टाको यात्रा गरी क्यानबेरा पुगेको हो ।
नेपाली टोलीले बिहीबार (असोज २३ गते) आफुभन्दा निकै बलियो प्रतिद्वन्द्वी अस्ट्रेलियासँग उसैको घरेलु मैदानमा विश्वकपको छनोट खेल खेल्दै छ ।
असोज १६ गते नै अस्ट्रेलिया आइपुगेको राष्ट्रिय टोलीले सिड्नीस्थित ‘सिड्नी एकेडेमी अफ स्पोर्ट एन्ड रिक्रिएसन’ मा ६ दिन अभ्यास गरेको थियो ।
राष्ट्रिय टोलीलाई सिड्नीमा अभ्यासका लागि सम्पूर्ण ब्यवस्था ‘अस्ट्रेलिया—नेपाल फुटबल संघ’ र एनआरएन अस्ट्रेलियाले मिलाएको थियो ।
सिड्नीबाट क्यानबेरा प्रस्थान गर्नुअघि नेपाली टोलीका सदस्यले ‘सिड्नी एकेडेमी अफ स्पोर्ट एन्ड रिक्रिएसन’ मै बडा दशैंको टिका थापेका थिए । टोलीका खेलाडी र अन्य सदस्यलाई टोली ब्यवस्थापक मधुसुदन उपाध्ययले टिका लगाइदिएका थिए ।
क्यानबेरामा राष्ट्रिय टोलीलाई नेपाली राजदुतावासका पदाधिकारी र एनआरएन अस्ट्रेलियाका पदाधिकारीले स्वागत गरेका थिए ।
नेपाली टोलीको स्वागतका लागि अस्ट्रेलियास्थित नेपाली राजदुतावासकी कार्यवाहक राजदुत द्रुपदा सापकोटा पनि होटल पुगेकी थिइन् ।
सिड्नीको तुलनामा निकै चिसो मौसम रहेको क्यानबेरामा नेपाली खेलाडीले मंगलबार पनि नियमित अभ्यास गरेका छन् ।
राष्ट्रिय टोलीले अभ्यास गरिरहँदा क्यानबेरामा हल्का वर्षा पनि भएको थियो । वर्षाका बीच नै चिसो मौसममा खेलाडीले करिब दुई घन्टा अभ्यास गरे ।
नेपाली टोलीका प्रशिक्षक योहान कालिनले टोलीको तयारी उत्कृष्ट रहेको बताए ।
उनले अस्ट्रेलिया बलियो टोली भए पनि आफ्ना खेलाडीको तयारी र मनोबल उच्च रहेको प्रतिक्रिया दिए ।
यसैगरी नेपाली टोलीका कप्तान किरन चेम्जोङले पनि अस्ट्रेलियाविरुद्घको खेलका लागि आफुहरुले गतिलो तयारी गरेको बताए ।
उनले करिब एक साता अगाडि अस्ट्रेलिया आएर तयार गर्न पाउँदा खेलाडीको मनोबल पनि उच्च भएको धारणा ब्यक्त गरे ।
यसैबीच, बिहीबार हुने खेलका लागि रंगशालामा नेपाली समर्थकलाई छुट्याइएको सम्पूर्ण टिकट बिक्री भइसकेको बताइएको छ ।
स्थानीय आयोजकका अनुशार नेपाल र अस्ट्रेलियाबीचको खेल हेर्न करिब १६ हजार दर्शक उपस्थित हुने अनुमान गरिएको छ ।
-1746894755.jpeg)
