काठमाडौं । तेस्रो संस्करणको साफ यू–१५ फुटबल च्याम्पियनसिपमा नेपालले भोली (बुधबार) भारतसंग प्रतिस्पर्धा गर्दैछ ।
तेस्रो संस्करणको प्रतियोगिता भुटानमा सुरु हुन लागेको हो ।
खेल भुटानको चाम्लिङथाङ रंगशालामा स्थानिय समय अनुसार दिउँसो ३ बजे सुरु हुनेछ ।
अघिल्ला दुई संस्करणमा खासै गतिलो प्रर्दशन गर्न नसकेको नेपालले तेस्रो पटक उपाधि जित्ने लक्ष्य राखेको छ ।
नेपाली टिमका मुख्य प्रशिक्षक राकेश श्रेष्ठले सबै टिम बलियो प्रतिस्पर्धी भएकाले शतप्रतिशत चुनौती पेश गर्ने बताए ।
उनले भारतसंग बराबरीको सम्भावना रहेको उल्लेख गर्दै आक्रमक शैलीको फुटबल पस्किने उल्लेख गरे ।
'भारत र बंगलादेशका खेलाडीहरु धेरै उमेरका छन् । त्यसले गाह्रो हुन सक्छ ।' उनले भने, 'पुरुषको तुलनामा महिलाका प्रतियोगिता कम हुने भएकाले खेलाडी छनोटदेखि धेरै समस्या छ ।'
उनले नेपाली टिम बलियो रहेकाले भारतलाई चुनौती दिने दाबी गरे ।
नेपाली टिमकी कप्तान प्रीति राईले प्रतियोगिताको तयारी राम्रो रहेको बताईन् । उनले छोटो समयमा आफुहरुले धेरै कुरा सुधार गरेको उल्लेख गर्दै विगतको नजिता भन्दा वर्तमानको तयारीलाई हेर्न सुझाईन् ।
'भारत बलियो टिम हो तर हामी शतप्रतिशत दिएर खेल्नेछौ ।' उनले भनिन्, 'खेलाडीहरु दबाबमा छैनन् । हामी शारिरिक र मानसिक रुपमा तयार छौ ।'
सन् २०१७ मा सुरु भएको प्रतियोगिताको पहिलो संस्करण बंगलादेश र दोस्रो भारतले जितेको थियो ।
नेपालले असोज २४ गते बंगलादेश र २६ गते भुटानसंग खेल्नेछ ।
प्रतियोगिता नेपाल सहित, भारत, भुटान र बंगलादेश गरि चार टिम सहभागी छन् ।
सबै टिमले राउण्ड रोबिन लिगका आधारमा प्रतिस्पर्धा गर्नेछन् ।
शीर्ष दुई टिमले उपाधिका लागि प्रतिस्पर्धा गर्नेछन् ।
-1746894755.jpeg)
