काठमाडौं । मेघराज केसी फेरी राष्ट्रिय टिम हेर्ने गरि फर्किएका छन् । तर उनले अब उमेर समुहको यू–१९ टिमको नेतृत्व गर्नेछन् । पछिल्लो हप्तामात्र यसको टुङ्गो लागेको हो ।
हुन त एन्फाको टेक्निकल कमिटिले मेघराज र छिरिङ लोप्साङको नाम प्रस्ताव गरेको थियो । तर एन्फाले पहिलो नम्बरमा सिफारिसमा परेका मेघराजलाई रोज्यो ।
मेघराज घरेलु फुटबलमा सर्वाधिक सफल प्रशिक्षक हुन् । ए डिभिजन शीर्ष क्लबको पहिलो रोजाईका प्रशिक्षक हुन्, उनी ।
एक हिसावमा उनलाई सेलिब्रेटी प्रशिक्षक भन्दा फरक पर्दैन । प्रशिक्षकको रुपमा उनी लोकप्रिय छन् ।
मेघराजले लामो समय राष्ट्रिय फुटबल टिममा काम गरे । सहायक प्रशिक्षकको रुपमा उनी लामो समय रहे । त्यस दौरान उनले नेपाल आएका धेरै विदेशी प्रशिक्षकसंग काम गर्ने मौका पाए ।
निखारिए, माझिए । फुटबलमा धेरै सिक्ने मौका पाए ।
त्यसैले पनि उनको व्यक्तिगत स्वभाव र काम गर्ने शैली अरु भन्दा फरक छ । फुटबललाई हेर्ने दृष्टिकोण र खेल दैरान उनले बनाउने रणनीति अरु भन्दा फरक छ ।
एउटा कुरा भनि हालौ, पछिल्ला ७ बर्ष उनी एन्फाभन्दा बाहिर रहे ।
यस दौरान काठमाडौंका ए डिभिजन क्लबहरु हेरे । हिमालयन शेर्पा गए, फेरी फ्रेन्ड्ससंग जोडिन आईपुगे । हिमालयन शेर्पा र फ्रेन्ड्समा झण्डै डेढ बर्षमात्र बिताए ।
अनि लागे विभागीय टिम आर्मीतिर ।
आर्मीलाई घरेलु फुटबलमा नयाँ शक्तिको रुपमा स्थापित गरे । उनी गएपछि हो आर्मीले घरेलु फुटबलमा उपाधि जित्न थालेको ।
झण्डै दुई बर्ष आर्मीमा बिताएपछि उनी विश्राम लिने मुडमा थिए । तर उनलाई फुटबलले कहाँ छोड्न मान्थ्यो र !
पुन थ्री स्टार क्लब सम्हाल्ने जिम्मेवारी आईलाग्यो । उनी अहिलेपनि थ्री स्टारमा छन् । मेघराज थ्री स्टारमा मुख्य प्रशिक्षक हुन् । पछिल्लो चार बर्ष यता उनी थ्री स्टारमा निरन्तर छन् ।
तर एक्कासी उनलाई उमेर समुहको राष्ट्रिय टिम हेर्ने जिम्मेवारी आईलाग्यो ।
यसको पनि एक खास कारण छ ।
केही हप्ता अघि नेपालले घरेलु भूमीमा साफ यू–१८ खेल्यो । सूरुवाती दुई संस्करणको उपाधि विजेता नेपालले घरेलु भूमीमै तेस्रो संस्करण जित्ने लक्ष्य राखेको थियो ।
तर नेपालको सपना क्षणभरमै भताभुंग बन्यो । नेपाल समुह चरणमा भुटानसंग ३–० को लज्जास्पद हार ब्यहोर्दै प्रतियोगिताबाट बाहिरियो ।
लगत्तै एन्फाले यू–१८ टिमका तीन जना प्रशिक्षकको राजीनामा माग्यो ।
तर त्यही टिमले अर्को महिना एएफसी यू–१९ छनोट च्याम्पियनसिप खेल्नपर्ने थियो ।
टिम मुख्य प्रशिक्षक विहिन अवस्थामा पुग्यो ।
एन्फाले यही जटिल अवस्थामा एएफसी छनोटको चुनौती सहित टिमको नेतृत्वमा मेघराज केसीलाई सुम्पिएको हो ।
हुन त मेघराजसंग उमेर समुहको टिम हेरेको धेरै अनुभव छैन । उनले धेरै समय सिनियर राष्ट्रिय टिमसंग काम गरे ।
तर देशले दिएको जिम्मेवारीबाट उनी पछि हट्न सक्ने अवस्थामा थिएनन् । उनले चुनौती स्विकार गर्ने निर्णय लिए ।
'लामो समय सिनियर टिम हेरेको अनुभव छैन । तर देशलाई आवश्यकता परेको बेलामा योगदान गर्न पर्छ भनेर स्विकार गरेको हुँ ।' मेघराजले खेलपाटीसंग भने ।
उमेर समुहको खासै अनुभव नभएका कारणले मेघराजले उमेर समुहकै अनुभवी प्रशिक्षकलाई सहायक राख्ने सोच बनाएका छन् । तर यसको टुङ्गो लाग्न बाँकी छ ।
एन्फाले दिएको चुनौतीबारे मेघराज पुर्ण जानकार छन् । अर्को कुरा, उनीसंग पर्याप्त समय पनि हुने छैन । करिब २० दिन उनले खेलाडीसंग बिताउन पाउनेछन् ।
साफमा नेपालले भुटान र माल्दिभ्ससंग प्रतिस्पर्धा गरेको थियो । तर एएफसी छनोटमा नेपालले बलिया प्रतिद्वन्दी ईरान, युएई र कीर्गिस्तानसंग खेल्नुपर्नेछ ।
'प्रतिद्वन्दी बलिया छन् । छोटो समयमा खेलाडीमा सिप सिकाउन सकिदैन ।' उनी भन्छन्, 'पोजिसनलाई प्राथमिकतामा राखेर खेलाडी छनोट गर्नुपर्नेछ ।'
मेघराज खेलाडीलाई मानसिक रुपमा तयार बनाउनु आफ्ना लागि मुख्य चुनौती मान्छन् ।
'खेलाडीको सिप र क्षमतालाई सतप्रतिशत प्रयोगमा ल्याउन मानसिक रुपमा तयार बनाउनु मुख्य चुनौती ठानेको छु ।' उनी भन्छन् ।
एन्फाले एएफसी छनोटका लागि प्रारम्भिक ४८ सदस्यीय खेलाडीलाई प्रशिक्षणमा बोलाएको छ । दशै लगत्तै खेलाडीको अभ्यास सुरु हुनेछ ।
अर्को कुरा भनिहालौ,
करिब दुई बर्ष अघि मेघराजलाई यू–२३ टिम हेर्न एन्फाले आग्रह गरेको थियो । तर उनले प्रशिक्षकको पद अस्विकार गरिदिएका थिए । उनले एन्फा सामु केही शर्त राखेका थिए ।
प्रशिक्षक पद पाउन हानथाप हुने नेपाली फुटबलमा मेघराजले उल्टै शर्त तेर्साएपछि एन्फा पदाधिकारी नि छक्क परे ।
एन्फासंग तमाम बिमती राखेर उनीले यू–२३ टिमको नेतृत्व स्विकार गर्न चाहेनन् । अरु बाहिरै बसे, क्लब हेरे ।
तर दुई बर्षपछि पुन उनी राष्ट्रिय टिम हेर्ने जिम्मेवारी सहित फर्किएका छन् । प्रश्न स्वभाविक रुपमा उठ्छ ।
फेरी उनले यू–१९ टिमको नेतृत्व किन स्विकार गरे त ?
'यहाँपनि मेरा केही शर्त छन् । तर शर्तहरु नखुलाउ होला ।' मेघराज भन्छन् ।
हसिलो मिजास तर कडा स्वभावका मेघराजले के एएफसी छनोटको चुनौती पार गर्लान् ?
अहिलेलाई मेघराजबाट सकारात्मक नतिजाको अपेक्षा गरौ ।
-1746894755.jpeg)
