काठमाडौं । च्याम्पियन्स लिग फुटबलमा आज (मंगलबार) राति ८ खेल हुदैछ । युरोपेली क्लब फुटबलको सबै भन्दा ठुलो प्रतियोगिताको नयाँ सिजन आज सुरु हुन लागेको हो ।
सहभागी क्लब समुह चरणको पहिलो खेलमा प्रतिस्पर्धा गर्दैछन् ।
गत सिजनको च्याम्पियन लिभरपुलले ईटालियन क्लब नापोलीसंग खेल्दै च्याम्पियन्स लिगको सुरुवात गर्दैछ ।
तर लिभरपुल प्रशिक्षक योर्गेन क्लोप आफ्नो क्लब विश्वको ठुलो क्लब नभएको मान्यता राख्छन् । उनी म्यानचेष्टर सिटीलाई विश्वको उत्कृष्ट टिम भन्न रुचाउँछन् । प्रिमियर लिगमा राम्रो सुरुवात गरेको लिभरपुल च्याम्पियन्स लिगमा समेत सोही लयलाई कायम राख्न चाहन्छ । त्यसका लागि नापोलीको घरेलु मैदानमा सुखद नतिजा निकाल्ने उसले लक्ष्य छ ।
अर्को खेलमा स्पेनिस क्लब बार्सिलोनाले जर्मन क्लब बोरुसिया डर्टमण्डसंग खेल्दैछ । बार्सिलोनाका लागि खुसीका कुरा उसका कप्तान लियोनल मेस्सी लामो समयको बिश्रामपछि मैदान फर्कदैछन् ।
गत जुलाईमा कोपा अमेरिका खेलपछि मेस्सी मैदानमा देखिएका छैनन् । उनले स्पेनिस लिगका सुरुवाती चार खेल गुमाएका थिए ।
बार्सिलोनाको मेडिकल टिमले मेस्सी खेल्नका लागि फिट रहेको बताएको छ । मेस्सीले सोमबारको अभ्यास सत्रमा समेत सहभागी भएका थिए । बार्सिलोनाका युवा स्टार अंशु फाती समेत च्याम्पियन्स लिग खेल्ने टोलीमा सहभागी छन् ।
उनले स्पेनिस लिगको १ सय १६ मिनेटमा दुई गोल गर्नुका साथै गोलको अवसर समेत सिर्जना गरेका छन् ।
त्यस्तै प्रिमियर लिगको सफल क्लब चेल्सीले स्पेनिस क्लब भ्यालेन्सियालाई स्टामफोर्ड ब्रिजमा आमन्त्रण गर्दैछ । क्लबको नेतृत्वको सम्हालेका फ्रान्क लाम्पार्ट समेत च्याम्पियन्स लिगमा टोलीले सनसनी प्रर्दशन गर्ने बताउँछन् ।
प्रिमियर लिगका पछिल्ला खेलमा लयमा देखिएको चेल्सीले सुरुमा नकआउट चरण पुग्ने लक्ष्य राखेको छ ।
आजै राति हुने अन्य खेलमा ईटालियन क्लब ईन्टर मिलानले चेक क्लब स्लाभिया प्रागलाई घरेलु मैदानमा आमन्त्रण गर्दैछ ।
अर्को फ्रान्सेली क्लब लियोनले समेत घरेलु मैदानमा रसियन क्लब जेन्ट सेन्ट पिटरवर्गलाई बोलाउँदैछ ।
अन्य खेलमा अष्ट्रेलियन क्लब आरबी सालज्वर्गले बेल्जियन केआरसी जिन्कसंग, पोर्चुगलको बेन्फिकाले जर्मन क्लब लिपजिगसंग तथा डच क्लब अजाक्सले फ्रान्सेली क्लब लिलीसंग प्रतिस्पर्धा गर्दैछ ।
