काठमाडौं । हसन्टार युथ क्लबको आयोजनामा प्रथम मेयर कप फुटबल प्रतियोगिता कात्तिक १ गतेदेखि हुने भएको छ ।
आयोजक हसन्टार युथ क्लबले बुधबार पत्रकार सम्मेलन गर्दै प्रतियोगिता कात्तिक १ गतेबाट सुरु हुने जनाएको छ ।
प्रतियोगितामा २० टिमको सहभागिता रहने आयोजक क्लबका अध्यक्ष विश्वकर लामाले जानकारी गराए ।
पहिलो हुने टिमले १ लाख ५ हजार तथा दोश्रोले ५५ हजार नगद पुरस्कार पाउने छन् ।
उत्कृष्ट खेलाडी, उत्कृष्ट गोलरक्षक र सर्वाधिक गोलकर्तालाई समान १० हजार नगद पुरस्कार प्रदान गरिने छ । अनुशासित टिमलाई १५ हजार नगद पुरस्कारबाट पुरस्कृत गरिने छ ।
प्रतियोगिता सञ्चालन गर्न करिब ९ लाख ५९ हजार खर्च हुने बताइएको छ । त्यसमा नागर्जुन नगरपालिकाले ५० प्रतिशत खर्च ब्यहोर्ने र बाँकी रकम नागर्जुन नगरपालिका वडा नं. ७ र आयोजकले व्यवस्थापन गर्ने अध्यक्ष लामाले जानकारी दिए ।
पत्रकार सम्मेलनमा नागर्जुन नगरपालिकाका मेयर मोहनबहादुर बस्नेतले खेलकुदको विकास र विस्तारका लागि नगरपालिकाले सक्दो सहयोग गर्ने प्रतिबद्धता जनाए ।
नकआउट आधारमा हुने प्रतियोगिताका खेलहरु नागर्जुन नगरपालिकास्थित हसन्टार फुटबल मैदानमा खेलाइने छ । फाइनल कात्तिक ९ गते हुनेछ ।
