काठमाडौं । राष्ट्रिय फुटबल टिमका नयाँ कप्तान सुजल श्रेष्ठको नेतृत्वमा नेपालले यसै हप्ता मलेसियन लिग च्याम्पियन जोहोर साउदर्न टाइगर्स एफसीसँग मैत्रिपूर्ण खेल खेल्यो ।
मलेसियामा भएको खेलमा नेपाली टिम मलेसियन सुपर लिग च्याम्पियन जोहोरसँग १–० गोल अन्तरले पराजित भयो । जोहारका निकोलस अवर्टाेले खेलको तेस्रो मिनेटमा गरेको गोलनै खेलमा निर्णायक गोल बन्यो ।
पहिलो हाफमा एक गोल खाएको नेपालले दोस्रो हाफमा उत्कृष्ट खेल प्रदर्शन गरेको थियो । तर, दोस्रो हाफमा गोल फर्काउन असफल भएको नेपाल जोहोरलाई नतिजा सुम्पन बाध्य भयो ।
मलेसियन क्लबसँग पराजित भएपनि सुजलका लागि मलेसिया भ्रमण भने बिशेष रह्यो । सुजलले पहिलो पटक राष्ट्रिय टिमको आर्म ब्याण्ड लगाउन पाए । पहिलो पटक देशको टिमलाई नेतृत्व गर्न पाएकोमा सुजललाई गर्व लागेको छ ।
‘यसरी देशको लागि आर्म ब्याण्ड लगाउन पाउँछु भनेर सोचेको थिईन । पहिलो पटक देशको कप्तानी गर्न पाए । गर्वको कुरा हो यो । म धेरै खुसी छु,’ मलेसियाबाट स्वदेश फर्किएपछि सुजलले भने, ‘जित निकाल्न सकेनौं यद्यपि खेल भने राम्रो खेलेका थियौं । समग्र रुपमा मलेसिया भ्रमण राम्रो रह्यो ।’
नियमित कप्तान विराज महर्जन, उपकप्तान किरण कुमार लिम्बुसँगै अनुभवी खेलाडी रोहित चन्द टिम बाहिर रहनुनै सुजलको लागि बिशेष बन्न पुग्यो ।
विराज फिटनेस समस्याका कारण टिम बाहिर रहन पुगे । यस्तै किरण जापानी क्लबमा ट्रायल दिन गएका थिए भने रोहित इन्डोनेसियाको लिगमा व्यस्त छन् ।
यी तीनै खेलाडीको अनुपस्थितिमा स्विडिस प्रशिक्षक जोहान कालिनले सुजललाई नेतृत्व गर्ने जिम्मा दिएका थिए । सुजलले प्रशिक्षकको रोजाईलाई न्याय दिन प्रयास गरे ।
मलेसियन क्लबसँग पराजित भएपनि टोलीको प्रदर्शनबाट प्रशिक्षक खुशी रहेको सुजलको भनाई छ । ‘कोचले पनि यस अघिका चार खेलभन्दा यो खेल निकै राम्रो मानेका छन् । त्यसैले विश्वकप छनोट दोस्रो चरण अघि केहि राम्रो तयारी रह्यो ।’ सुजलले भने ।
कतारमा सन् २०२२ मा आयोजना हुने फिफा विश्वकप र चीनमा सन् २०२३ मा आयोजना हुने एएफसी एसियन कपको तयारीका लागि नेपालले मलेसियन क्लबसँग मैत्रीपूर्ण खेल खेलेको हो ।
पहिलो पटक सिधै दोस्रो चरणको छनोट खेल्न पाएको नेपाल छनोटको समूह 'बी' मा रहेको छ । नेपालको समूहमा विश्वकप खेलिसकेको अष्ट्रेलिया सहित जोर्डन, कुवेत र चाईनिज ताईपे रहेका छन् ।
नेपालले भदौ १९ गते कुवेतसँग खेल्दै छनोटको सुरुवात गर्नेछ ।
कुवेतसँगको खेलका लागि नेपाली टिम मलेसियाबाट फर्के लगत्तै पुनः तयारीमा जुटिसकेको छ । प्रशिक्षक कालिनले खेलाडीलाई आराम नगराई तयारी थालेको हो ।
-1746894755.jpeg)
