काठमाडौं । पल्सर सहिद स्मारक 'ए' डिभिजन लिग फुटबलमा व्यक्तिगत विधातर्फ उत्कृष्ट बनेका खेलाडीले पुरस्कार पाउने भएका छन् ।
अखिल नेपाल फुटबल संघ (एन्फा) ले प्रतियोगिता सकिएको झन्डै ७ महिनापछि उत्कृष्ट चुनिएका ५ खेलाडी र प्रशिक्षकलाई पुरस्कार बापतको पल्सर मोटरसाइकल उपलब्ध गराउने भएको छ ।
एन्फाले राष्ट्रिय टिमका खेलाडीहरु मलेसियाबाट फर्किएपछि खेलाडीहरुलाई पुरस्कार प्रदान गर्ने जनाएको छ ।
मलेसियाको लिग च्याम्पियन जोहार डारुल टाजिम एफसीसँगको मैत्रिपूर्ण खेलका लागि नेपाली टिम अहिले मलेसियामा रहेका छन् । नेपाली टोलीमा मोटरसाइकल पाउने चार खेलाडी रहेका छन् ।
एन्फा कोषाध्यक्ष रविन्द्र जोशीले खेलाडीले तोकिए अनुसारकै पल्सर मोटरसाइकल पाउने खेलपाटीलाई जानकारी गराए ।
‘खेलाडीले पाउने बाइकको निर्णय भईसकेको छ । अब हामी चाडै खेलाडीलाई हस्तान्तरण गर्नेछौं,’ जोशीले खेलपाटीसँग भने ।
लिग गत पुष २४ गते सकिएको थियो । जसमा मनाङ मर्स्याङ्दी च्याम्पियन बनेको थियो ।
लिगमा मनाङका विशाल श्रेष्ठ उत्कृष्ट गोलरक्षक, हेमन गुरुङ उत्कृष्ट मिडफिल्डर र सुमन श्रेष्ठ उत्कृष्ट प्रशिक्षक चुनिएका थिए । यस्तै थ्रीस्टारका रेजिन धिमाल उत्कृष्ट डिफेन्डर र आर्मीका भरत खवास उत्कृष्ट फरवार्ड चुनिएका थिए ।
पुरस्कृत हुने विशाल, हेमन र रेजिन मलेसियामा रहेका छन् । यस्तै भरत विभागको तालिमका लागि थाईल्याण्डमा छन् भने प्रशिक्षक सुमन धरानको एकेडेमीमा प्रशिक्षकको भूमिकामा रहेका छन् ।
लिगको पुरस्कार समारोहमा भने खेलाडीले मोटरसाइकल चढेरै फोटो खिचाएका थिए । तर, लिग सकिएको लामो समय बितिसक्दा समेत एन्फाले खेलाडीलाई व्यक्तिगत पुरस्कार उपलब्ध गराउन सकेको थिएन् ।
लिगको बजार व्यवस्थापनको जिम्मेवारी पाएको रामसार मिडिया प्रालि एन्फाको सम्पर्कबाहिर रहेपछि खेलाडीले पुरस्कार पाउन सकेको थिएन् । रामसारले मोटरसाइकलका लागि पल्सरको अधिकारिक बिक्रेता हंसराज हुलास चन्द एण्ड कम्पनीसँग सम्झौता गरेको थियो ।
तर, पछिल्लो हप्ता रामसार एन्फासँग सम्पर्कमा आएपछि खेलाडीले पुरस्कार पाउने भएका हुन् । एन्फा र रामसारबीच एक हप्ताभित्र मोटरसाइकल उपलब्ध गराउने नयाँ सम्झौता समेत भएको छ ।
सम्झौता अनुसार खेलाडीले यसअघि घोषणा गरे अनुसारकै पल्सर एनएस १६० सीसीको मोटरसाइकल पाउने छन् ।
एन्फाका महासचिव इन्द्रमान तुलाधरले खेलाडीले सम्झौता अनुसारकै मोटरसाइकल पाउने बताए ।
‘पहिले भएको सम्झौता अनुसार नै हाम्रा खेलाडीहरुले पुरस्कार पाउनेछन्,’ महासचिव तुलाधरले भने ।
-1746894755.jpeg)
