एजेन्सी । साविकको विजेता म्यानचेस्टर सिटीले इन्ग्लिश प्रिमियर लिग अन्तर्गत नयाँ सिजनको पहिलो खेलमा फराकिलो जित निकालेको छ ।
शनिबार भएको सिजनको पहिलो खेलमा वेष्ट ह्यामलाई ५-० गोल अन्तरले पराजित गर्दै सिटीले सुखद सुरुवात गरेको हो ।
वेष्ट ह्यामको मैदानमा सिटीलाई जित दिलाउन रहिम स्टर्लिङले ह्याट्रिक गोल गरे । यस्तै ग्राबियल जिसस र सर्जियो अग्युरोले एक एक गोल गरे ।
घरेलु टिमविरुद्ध पहिलो हाफमा एक गोल गरेको सिटीले दोस्रो हाफमा थप चार गोल गरेको थियो ।
खेलको २५ औं मिनेटमा जिससले गोल गर्दै सिटीलाई अग्रता दिलाएका थिए । ५१ औं मिनेटमा स्टर्लिङले सिटीको अग्रता २-० को बनाए । ७५ औं मिनेटमा स्टर्लिङले व्यक्तिगत दोस्रो गोल गर्दै सिटीको अग्रता तेब्बर बनाए ।
८६ औं मिनेटमा अग्युरोले पेनाल्टीमा गोल गर्दै सिटीको अग्रता ४-० को बनाए । त्यसपछि खेलको ९० औं मिनेटमा स्टर्लिङले ह्याट्रिक पुरा गर्दै सिटीलाई ५-० को जित दिलाए ।
जितसँगै सिटीले ३ अंकबाट सिजनको सुरुवात गरेको छ । वेष्ट ह्यामले भने हारबाट सिजनको सुरुवात गरेको छ ।
प्रिमियर लिगमा लिभरपुलले पनि विजयी सुरुवात गरिसकेको छ ।
-1751597995.webp)
