काठमाडौं । उमेर समूहको साफ च्याम्पियनसिपको पछिल्लो दुई संस्करणको उपाधि नेपालले हात पारिसकेको छ । दक्षिण एसियाली फुटबल महासंघ (साफ) ले सन् २०१५ मा आयोजना गरेको यू–१९ र २०१७ मा आयोजना गरेको यू–१८ साफ च्याम्पियनसिप नेपाल जितेको थियो ।
काठमाडौंमा सम्पन्न यू–१९ साफमा नेपालले भारतलाई हराएर उपाधि जितेको थियो । साे उपाधि जित्दा हाल राष्ट्रिय टिममा रहेका विमल घर्ति मगर, अन्जन विष्ट, तेज तामाङ, सुनिल बल, अनन्त तामाङ, हेमन्त थापा मगर लगायतका खेलाडी रहेका थिए ।
यस्तै भुटानमा भएको यू-१८ साफमा नेपालले हेड टु हेडको आधारमा उपाधि जितेको थियो । राउण्ड रोविनको आधारमा खेलाईएको प्रतियोगितामा बंगलादेश र नेपालले समान ९–९ अंक जोडेको थियो ।
तर, लिग चरणमा नेपालले बंगलादेशलाई पराजित गरेको कारण 'हेड टु हेड' का आधारमा नेपाल च्याम्पियन भयो । साफले यू-१९ लाई परिमार्जन गर्दै भुटानबाट यू–१८ आयोजना गरेको थियो ।
साफ यू-१८ जित्दा अभिषेक रिजाल, सुमन अर्याल जस्ता राष्ट्रिय टोलीका सदस्य रहेका थिए । साफ यू-१८ को तेस्रो संस्करण भने नेपालमै आयोजना हुँदैछ ।
आगामी सेप्टेम्बर २० देखि २९ सम्म चल्ने प्रतियोगिता हलचाेकस्थित शसस्त्र प्रहरी बल एपीएफको हल्चोक मैदानमा हुनेछ । तर, मैदान अभावको कारण नेपालले निकै ढिलो तयारी सुरु गरेको छ ।
जसको कारण घरेलु भूमिमा आयोजना हुने साफ यू-१८ को उपाधि जोगाउन नेपाललाई निकै कठिन देखिएको छ । प्रतियोगिता आउन ४५ दिनमात्रै रहँदा नेपालले आइतबारबाट जावलाखेलस्थित जावलाखेल युथ क्लबको मैदानमा तयारी सुरु गरेको हो ।
अखिल नेपाल फुटबल संघ (एन्फा) ले नेपाली टोली हेर्ने जिम्मा मुख्य प्रशिक्षक चेत नारायण श्रेष्ठलाई दिएको छ । यस्तै सहायक प्रशिक्षकमा सनोज श्रेष्ठ र गोलरक्षक प्रशिक्षकमा छत्रुराम चौधरी रहेका छन् ।
‘मैदान अभावका कारण हामीले तयारी पनि ढिला गर्न पुग्यौ । अहिले जावलाखेलको मैदानमा सुरु गरेको छौं । मैदान खाली भएपछि एन्फा मैदानमा नै तयारी गर्नेछौं,’ प्रशिक्षक श्रेष्ठले भने ।
सातदोबाटोस्थित एन्फा कम्प्लेक्स निकै व्यस्त रहेको छ । जसको कारण नेपाली टोलीले जावलाखेल मैदानमा तयारी सुरु गरेको हो । तर, जावलाखेल मैदानमा सामान्य घाँस उमार्ने काम र खाल्टाखुल्टी पुर्ने काम भैरहेकाले युवा टिमको तयारीमा असर गरेको छ ।
नेपाल मैदानको अभावकोबीच तयारीमा रहदा अन्य देशले भने निकै राम्रो तयारी गरिरहेको छन् । प्रतियोगिताको दाबेदार मानिएको भारत अहिले युरोप भ्रमणमा रहको छ । उसले टर्कीमा तयारी गरिरहेको छ । नेपालकाे भने कुनै वैदेशिक प्रशिक्षणको टुङ्गाे लागेकाे छैन ।
मुख्य प्रशिक्षक श्रेष्ठले अब टिमले वैदेशिक प्रशिक्षण गर्ने सम्भावना निकै कम रहेको बताउँछन् ।
‘सम्भवत हाम्रो बाहिरी टिमसँग मैत्रीपूर्ण खेल्ने सम्भावना निकै कम रहेको छ । अब हामी यहाँका राम्रो क्लबसँग रहेर तयारी गर्छाैं ।’ प्रशिक्षक श्रेष्ठले भने, ‘भारत लगायत बंगलादेश पनि राम्रो तयारी गरिरहेको छ । हाम्रो हुन सकेन अब कसरी हुन्छ । हामी राम्रो गर्ने तिर लाग्छौ ।’
