एजेन्सी । ब्राजिली स्टार नेयमारले फ्रान्सेली क्लब पेरिस सेन्ट जर्मेन पीएसजी पुगेर क्लब छाड्न चाहेको बताएका छन् । नेयमारको पेरिस बसाईलाई लिएर विभिन्न अड्कलबाजी भईरहेको छ ।
पीएसजीको प्रि–सिजनको प्रशिक्षणमा नदेखिएका नेयमार पेरिस पुगेर आफ्नो क्लब छाड्ने मनसाय रहेको बताएका हुन् । उनले क्लबका खेल निर्देशकसंग लियोनार्दोलाई भेट गरेर क्लब छाड्न चाहेको बिषयमा स्पष्ट पारिसकेका छन् ।
नेयमारले क्लब छाड्ने मनसाय देखाएपनि पीएसजीले उनलाई मनाउन कोशिश गरिरहेको थियो । क्लबले नेयमारको सोच परिवर्तन गर्न सकिने विश्वास देखाएको थियो ।
तर पेरिस पुगेका नेयमारले क्लबका निर्देशकसंग भेट गर्दै पीएसजी छाड्ने मनसाय रहेको सुनाएका हुन् । तर नेयमारले आफु जान चाहेको क्लबको बिषयमा भने केही उल्लेख गरेका छैनन् ।
२७ बर्षका स्टार पछिल्लो समय स्पेनिस क्लब बार्सिलोना फर्कन चाहन्छन् ।
बार्सिलोनाले नेयमारका लागि औपचारिक प्रस्ताव राख्न बाँकी छ । तर स्पेनिस महारथीले कोही खेलाडीलाई नेयमार लिने शर्तमा बेच्न सक्नेछ ।
फिलिप कौटिन्होको नाम खेलाडी साटफेरको सुचिमा रहेको छ । उनी लोन वा स्थायी रुपमै क्लब छाड्न सक्नेछन् । कौटिन्होको बसाई बार्सिलोनाले नेयमारको बिषयमा गर्ने निर्णयले धेरै हदसम्म निर्धारण गर्नेछ ।
पीएसजीका खेल निर्देशक लियोनार्दोले पछिल्लो समय उचित प्रस्ताव आएर नेयमारले क्लब छाड्न सक्ने बताएका थिए ।
