एजेन्सी । युरोपेली फुटबल महासंघ युईएफएले च्याम्पियन्स लिगको फाइनल नजिक पुगेका टिमलाई सुरक्षित गर्न सकिने विकल्पमा छलफल अघि बढाएको छ । च्याम्पियन्स लिगको नयाँ सिजनमा फाईनल नजिक पुगेका टिमले खेल्न पाउने गरि युईएफएले नियम बनाउने तयारी गरिएको हो ।
आयाक्सले गत सिजन च्याम्पियन्स लिगको सेमिफाइनल यात्रा तय गरेको थियो । तर उसले अहिले आफ्नो क्लबका उत्कृष्ट खेलाडीलाई बेच्नु परेको छ । आयाक्स नयाँ सिजनको च्याम्पियन्स लिगमा पर्ने सम्भावना निश्चित नभएकाले क्लबले सो निर्णय लिनु परेको हो ।
युईएफएका अध्यक्ष एलेक्सेन्डर सेफरिनले पहिलेको जस्तो अवस्था दोहोरिन नदिन केही प्रस्ताव माथि छलफल गरिने बताएका छन् ।
उनले भनेका छन्, ‘यो वर्ष हामी आयाक्स अथवा मोनाको र लेस्टिर जस्ता टिमलाई सुरक्षित गर्न चाहन्छौ । जसले सेमिफाइनल र क्वाटरफाइनलको यात्रा तय गरेका थिए ।
‘आयाक्सले यस सिजन सेमिफाइनल यात्रा तय गरेको थियो । तर उसले आफ्ना सबै खेलाडी बेच्नु परेको छ । किनकी उनीहरु अर्को सिजनका च्याम्पियन्स लिगमा छनोट हुने निश्चित छैन ।’ उनले थपे, ‘धेरै क्लबलाई सुरक्षित गनुपर्छ भन्ने मलाई लाग्दैन । तर उपाधिको नजिक पुगेका क्लबहरुलाई भने अर्को सिजनका लागि निश्चित गरिन पर्छ ।’
सेफरिनले भने, ‘एउटा उपाय छ, जुन क्लबले निश्चित तह पार गर्छ, उसले अर्को वर्ष पनि खेल्न पाउनुपर्छ । तर यो छलफल मात्र हो । यसबारेमा थप छलफल गरिनेछ ।’
युईएफएको आगामी कार्यसमिति बैठकमा यस बिषयमा थप छलफल हुने भएको छ ।
युईएफएले सहभागी क्लबको संख्या बढाएर ४० देखी ४८ सम्म बनाउने बिषयमा समेत छलफल अघि बढाउने भएको छ ।
यस्तै युरो कप र कोेपा अमेरिकाको च्याम्पियन देशबीचको खेल सञ्चालन गर्ने बिषयमा समेत युईएफएले बहष गर्नेछ ।
आयाक्स जस्ता कतिपय टिमलाई घरेलु लिगका आधारमा च्याम्पियन्स लिगको छनोट खेल्ने नियम बनाईएको छ ।
युरोपका शीर्ष १० राष्ट्रका क्लबहरु च्याम्पियन्स लिगमा स्वत छनोट हुने व्यवस्था छ । तर यस्तो नियमले डच क्लब आयाक्सलाई घाटा परेको छ । नेदरल्याण्ड लिग १४ औ स्थानमा छ ।
च्याम्पियन्स लिगको ३२ टिममध्ये समुह चरणमा २६ वटा स्वत छनोट हुने व्यवस्था छ । स्वत छनोट हुने क्लबहरुमा घरेलु लिग, च्याम्पियन्स लिग र युरोपा लिगबाट छनोट हुने गरेका छन् । र बाँकी टिमहरु प्ले अफको सहारा लिनुपर्ने व्यवस्था छ ।
उता प्ले अफ राउन्डबाट ६ बटा क्लब मात्र जाने व्यबस्था रहेका छ।
हाल युरोपका प्रसिद्ध चार लिग (ला लिगा, प्रिमियर लिग, सिरी ए र बुन्डेलिगा)बाट स्वत ४–४ टिमको सहभागीता रहन्छ । फ्रान्स र रसियाका तीन–तीन टोली पनि स्वत च्याम्पियन्स लिगमा जान्छन् ।
च्याम्पियन्स लिग र युरोपा लिगको विजेता टोलीसँगै एसोसिएट देशका घरेलु लिग विजेताबाट १० टोली सहभागी हुन्छन् । तर आयाक्स जस्ता क्लब तेस्रो क्वालिफाइङ राउन्डबाट छनोट भएर आउनुपर्ने बाध्यता छ । जसले गर्दा च्याम्पियन्स लिगमा स्थान बनाउन आयाक्स जस्ता टोलीले निकै कठिन चुनौती पार गरेको आउनुपर्ने देखिन्छ ।
सोही कारण युईएफएले च्याम्पियन्स लिगको उपाधि यात्राको नजिक पुगेका क्लबलाई अर्को सिजन कसरी समावेश गर्न सकिन्छ भन्ने बिषयमा छलफल अघि बढाउन लागेको हो ।
-1746894755.jpeg)
