काठमाडौं । विभागीय टोली त्रिभुवन आर्मी क्लबका नरेश थापा र किरण राना मगर राजधानीमा जारी प्रकाश दाहाल स्मृति राष्ट्रिय बक्सिङ प्रतियोगिताको क्वाटरफाइनलमा प्रवेश गरेका छन् ।
लैनचौरस्थित राष्ट्रिय टेवलटेनिस प्रशिक्षण केन्द्रको हलमा जारी प्रतियोगिताको पुरुष ६५ केजी तौल समूहमा आर्मीका नरेशले उदयपुरका सुजन राई र किरणले अल्टिमेटका विशाल बस्नेतलाई हराएर क्वाटरफाइनलमा स्थान पक्का गरे । यसै तौल समूहमा आश्रित बोहोराले नक्सालका छिरिङ शेर्पा र बुद्धि सागर गुरुङले सल्यानका मिलन बुढालाई हराउँदै क्वार्टरफाइनलमा पुगे । आर्मीका सुरेश नेपाल भने एपीएफका सोनम सार्कीसँग पराजित भए । यही तौलसमूहमा चितवनका सागर कुमालले दाङका रमेश थापामगरलाई हराए ।
प्रतियोगिताको महिलातर्फ बिहीबार दुई तौलसमूहको प्रतिस्पर्धा भएको थियो । जसमा महिलाको ५१ केजी तौलसमूहमा एपीएफकी माला राईले क्वाटरफाइनलमा स्थान पक्का गरिन् । मालाले उदयपुरकी सुजाता भूजेललाई हराउदै क्वाटरफाइनल यात्रा तय गरेकी हुन् । यसै तौल समूहमा आर्मीकी गीता कुमारी थापाले कैलालीकी सुष्मा तामाङ र नक्सालकी रोशनी राईले सुनसरीकी प्रभा निरौलालाई पराजित गर्दै क्वार्टरफाइनलमा स्थान पक्का गरे ।
महिला ४८ केजी तौलसमूहमा भक्तपुरकी अस्मिता दुवालले मकवानपुरकी सुष्मा गुरुङ र एपीएफकी सावित्री तामाङले भक्तपुरकी सुष्मा खड्कालाई हराउँदै क्वार्टरफाइनलमा स्थान पक्का गरे ।
प्रतियोगिता अन्तर्गत नै पुरुष ६० केजी तौलसमूहमा कञ्चनपुरका रामबहादुर थापाले चितवनका टेकन बुढामगर, चितवनका आकाश सुवेदीले झापाका तोविन प्रधान, झापाका प्रकाश लिम्बुले नक्सालका सुभम लिम्बु, एपीएफका सुमन कार्कीले टेक्निकल फिटनेशका जेनिश राई, आर्मीका दानबहादुर दर्लामीले बानुजका कर्मा तेञ्जिङ गुरुङ, मेघदूतका सकेन्द्र शाक्यले आर्मीमा पवन अली, मेघदूतकै सलेन शाहीले काठमाडौंका सुमन बज्राचार्य र नक्सालका किशोर शर्माले कैलालीका आशिष विष्टलाई हराएर क्वार्टरफाइनलमा स्थान पक्का गरेका छन् ।
पुरुष ५६ केजीमा कास्कीका दिनेश बानियाँले नक्सालका मिग्मा ग्याल्जेन शेर्पा, रामेछापका सुमन नेपालीले सुर्खेतका प्रकाश तामाङ, झापाका जितेन्द्र राईले उदयपुरका विमल भूजेल, कञ्चनपुरका महेन्द्र चन्दले सुनसरीका शिव राई, एपीएफका पुरन राईले दाङका प्रेम चौधरी, आर्मीका बाबुराम मगरले आर्मीकै राजु पुन, झापाका सुरेन्द्र राईले रामेछापका फूर्वा शेर्पा र आर्मीकै नरेश देवानले आर्मीकै पुरन सुनुवारलाई पराजित गर्दै क्वार्टरफाइनलमा स्थान बनाएका छन् ।
त्यस्तै पुरुष ५२ केजीमा दाङका होमराज न्यौपानेले झापाका अंकित मगर, आर्मीका बिकाश राईले झापाका भुगोल लिम्बु, आर्मीका डोलबहादुर चौधरीले आर्मीकै धिरज सिंह क्षेत्री, कास्कीका केशव नेपालीले कास्कीकै दिनेश गुरुङ, एपीएफका बिक्रम परियारले दाङका सिद्धान्त रावत र आर्मीका सुदीप श्रेष्ठले सल्यानका जनकबहादुर रोका मगरलाई हराउँदै क्वार्टरफाइनलमा प्रवेश गरे ।
पुरुषकै ४९ केजी तौलसमूहमा एपीएफका प्रदीप महर्जनले तेज पुनमगरलाई पराजित गरी क्वार्टरफाइनलमा स्थान बनाएका छन् ।
