लैंगिक विवादमा मुछिएकी खेलिफले जितिन् ओलम्पिक स्वर्ण

काठमाडौं। अल्जेरियाली बक्सर इमान खेलिफले आफूमाथि गरिएको लैंगिक आक्रमणले पेरिस ओलम्पिक २०२४ को जितलाई ‘विशेष स्वाद’ दिलाएको बताएकी छन्। विश्व च्याम्पियनसिपमा अयोग्य ठहराएको अर्को वर्ष नै उनले ओलम्पिक स्वर्ण जितेकी हुन्।

उनलाई लैंगिक योग्यता नपुगेको भन्दै गत वर्ष विश्व च्याम्पियनसिपबाट प्रतिबन्ध लगाइएको थियो। तर, उनलाई पेरिसमा खेल्न योग्य मानियो। र, उनले चिनियाँ विश्व च्याम्पियन याङ लिउलाई तीन राउन्डको प्रतिस्पर्धामा पराजित गर्दै वेल्टरवेटको स्वर्ण कब्जा गरिन्। सबै पाँच जना निर्णायकले उनको पक्षमा अधिकतम अंक दिए।

‘यो प्रतियोगितामा सहभागी हुन म पूर्ण रूपमा योग्य हो,’ २५ वर्षीया खेलिफले भनिन्, ‘म महिलाको रूपमा जन्मिएकी हुँ। म महिलाकै रूपमा बाँचिरहेकी छु। मैले महिलाकै रूपमा प्रतिस्पर्धा गरेकी छु, जसमा कुनै शंका छैन।’

खेलिफले अपमानको सिकार भएको उल्लेख गर्दै अन्तर्राष्ट्रिय बक्सिङ संघ (आईबा) ले ‘घृणा गरेको र यसबारे आफूलाई किन भन्ने वास्तवमै थाहा नभएको’ बताएकी छन्। उनको समर्थनमा अल्जेरियालीको आवाजले एरिना गुञ्जायमान भएको थियो। समर्थकहरूले हरियो, सेतो र रातो रंगको झन्डा फहराइरहेका थिए।

खेलिफले स्वर्णको प्रतिस्पर्धामा एकतर्फी खेल प्रदर्शन गर्दै सफलता हात पारेकी हुन्। जित हासिल गरेकी थाह पाएपछि उनी नाचिन्। नतिजा सार्वजनिक भएपछि याङले पनि खेलिफको हात उठाइदिइन्, जुन उनलाई पहिलो खेलमा इटालीकी अंगेला कारिनीले गरेको व्यवहारको ठिक उल्टो हो। त्यसपछि उनले आफ्ना प्रशिक्षकलाई अँगालो हालिन्। अल्जेरियाको राष्ट्रिय गान बज्दा उनको आँखाबाट आँसु बगेको थियो।

गत वर्ष खेलिफजस्तै प्रतिबन्धमा परेकी लीन यु–तिङले पोल्यान्डकी जुलिया स्जेरेमेताविरुद्ध फेदरवेटको फाइनलमा शनिबारै प्रतिस्पर्धा गर्दै छिन्।