काठमाडौं । खेलकुद मन्त्री डिगबहादुर लिम्बुले दशौं राष्ट्रिय खेलकुद तोकिएकै मितिमा आयोजना हुने बताएका छन् ।
कर्णाली प्रदेशको राजधानी सुर्खेतमा निर्माणाधिन रंगशालाको अवलोकन गर्ने क्रममा मन्त्री लिम्बुले कुनै विपत नपरे निर्धारित मितिमै प्रतियोगिता हुने बताएका हुन् ।
निर्माण भईरहेको रंगशाला र अन्य भौतिक पूर्वाधार निर्माणमा प्रदेश सरकारको लगानी तथा प्रदेश खेलकुद परिषद्को सक्रियता प्रति धन्यवाद दिदै अब पूर्वाधारको अभावमा प्रतियोगिता प्रभावित नहुने विश्वास व्यक्त गरे ।
अवलोकनको क्रममा राष्ट्रिय खेलकुद परिषद्का सदस्य सचिव टंकलाल घिसिङले २०८१ मंसिरमा दशौ राष्ट्रिय खेलकुद सम्पन्न गर्न राज्यका तीनै तहको उत्तीकै भूमिका रहने बनाए ।
दशौं राष्ट्रिय देलकुदको पूर्व तयारीका लागि आवश्यक परार्मशका लागि सुर्खेत पुगेको युवा तथा खेलकुद मन्त्रालय र राष्ट्रिय खेलकुद परिषद्को टोलीले रंगशालाको अवलोकन गरेको थियो ।
आठ विगाह क्षेत्रफलमा निर्माण भईरहेको रंगशालाको हाल सम्म ७० प्रतिशत बढी काम सम्पन्न भएको प्रदेश खेलकुद परिषद्का सदस्य सचिव विश्वामित्र सन्ज्यालले जानकारी दिए ।
आगामी जेठ भित्र सम्पन्न गर्ने गरि काम भएको भन्दै सन्ज्यालले बहुउदेश्य सहित मार्सल आर्ट र व्याडमिन्टनका समेत तीन वटा कभर्डहल निर्माण भएको जानकारी दिए ।
महिला क्रिकेट एकेडेमी बनाइने
कोहलपुर क्रिकेट रंगशालालाई महिला क्रिकेट एकेडेमी बनाउन पर्नेमा मन्त्री लिम्वुले सुझाव दिएका छन् ।
दशौ राष्ट्रिय खेलकुदको तयारी बैठकमा सुर्खेत जाने क्रममा क्रिकेट रंगशालाको अवलोकन गर्दै मन्त्री लिम्वु र राखेप सदस्य सचिव घिसिङले स्थानिय तह संगको सहकार्यमा रंगशालाको संरक्षण गर्नु पर्नेमा जोड दिए ।
पाँच विगाह क्षेत्रफलमा फैलिएको क्रिकेट रंगशालामा एकातर्फ प्यारापिट निर्माणको कार्य भईरहेको छ ।
करिब दुई करोड ११ लाख बजेटमा निमार्ण हुदै गरेको प्यारापिट २०८१ साल जेठ भित्र सम्पन्न हुने सम्झौता रहेको परिषद्का बोर्ड सदस्य तथा क्रिकेटका पूर्व कप्तान लेख बहादुर क्षेत्रीले जानकारी गराएका थिए ।
यस्तै मन्त्री लिम्बुले नेपालगन्जमा निर्माण हुँदै गरेको सेन्थेटिक ट्रयाकको पनि निरिक्षण गरेका छन् ।
११ करोड ६६ लाख बजेटबाट निर्माण हुँदै गरेको ट्याकमा हाल बेसको काम भईरहेको इन्जिनियर राजु श्रेष्ठले जानकारी दिएका छन् ।
आगामी पुस मसान्तभित्र सम्पन्न गर्ने गरि सम्झौता भएपनि चिसो मौसमा पिचको काम गर्न अप्ठेरो पर्ने भएकाले बैशाखसम्म काम सकिने बताईएको छ ।
निरिक्षणका क्रममा सदस्य सचिव टंकलाल घिसिङले निर्धारित समयभित्र काम सक्न निर्माण कम्पनीलाई निर्देशन दिएका थिए ।
