विम्बल्डन टेनिसमा सेरेनालाई २५ औं वरियता

एजेन्सी । यसै साता सुरु हुने विम्बल्डन टेनिसमा पूर्व विश्व नम्बर एक अमेरिकन टेनिस खेलाडी सेरेना विलियम्सलाई २५ औं वरियता प्राप्त हुने भएको छ ।

आमा बनेपछि पहिलोपटक ग्राण्डस्लाम टेनिस खेल्न लागेकी सेरेनालाई २५ औं वरियता प्राप्त हुने भएको हो । छोरीलाई जन्म दिएपछि तीन प्रतियोगितामा खेलेकी ३५ बर्षीय सेरेना यसअघि १८३ औं स्थानमा रहेकी थिइन् ।

सेरेनाले गत सेप्टेम्बरमा छोरी एलेक्सिस ओलम्पिया ओहानियनलाई जन्म दिएकी थिइन् । छोरीलाई जन्म दिएपछि गत चैतबाट टेनिस कोर्टमा फर्केकी सेरेनाले बर्षको तेस्रो ग्राण्डस्लाम विम्बल्डन खेल्न लागेकी हुन् ।

२३ पटकको ग्राण्डस्लाम विजेता सेरेनाले ७ पटक विम्बल्डन टेनिसको उपाधि जितिसकेकी छिन् । विम्बल्डनमा महिलातर्फ सिमोना हालेप शीर्ष स्थानमा रहने छिन् ।

यो बर्षको विम्बल्डन जुलाई २ बाट सुरु भई १५ जुलाईमा सकिने छ ।