स्वीकृतिबिना एन्फा निर्वाचन गरिए हामीलाई मान्य हुँदैन : राखेप

काठमाडौं। राष्ट्रिय खेलकुद परिषद् (राखेप) ले आफ्नो स्वीकृतिबिना गरिएको कुनै पनि खेल संघको निर्वाचन मान्य नहुने स्पष्ट पारेको छ।

राखेपले अखिल नेपाल फुटबल संघ (एन्फा)लाई सम्बोधन गर्दै पठाएको पत्रमा साधारण सभा (अर्डिनरी कांग्रेस) तथा निर्वाचनसम्बन्धी सबै प्रक्रिया आफूहरूको जानकारी र स्वीकृतिबिना अघि बढाइए मान्यता नपाउने चेतावनी दिएको हो।

‘राष्ट्रिय खेलकुद विकास नियमावली, २०७९ को नियम ७ को (ग) अनुसार परिषद्को स्वीकृती नभएको संघको साधारण सभा (अर्डिनरी कंग्रेस) तथा निर्वाचनले परिषदाट मान्यता मान्यता नपाउने हुँदा (कुनैपनि मुल कानूनमा रहेको व्यवस्थासँग बाझिएको हदसम्म सहायक कानूनमा रहेको सो सम्बन्धि व्यवस्था स्वतः निश्कृय हुने कानुनी सिद्धान्त अनुरूप) संघको साधारण सभा (अर्डिनरी कंग्रेस) तथा निर्वाचनसम्बन्धी सम्पूर्ण कार्य स्थगित गरी पत्र प्राप्त मितिले ३ (तीन) दिन भित्र राष्ट्रिय खेलकुद परिषद्लाई लिखित जानकारी गराउन हुन राष्ट्रिय खेलकुद विकास ऐन, २०७७ को दफा २९ को (१) बमोजिम जानकारी गराइन्छ। परिषद्बाट पटक पटक भएको निर्देशन पालना नगरी प्रकृया अगाडी बढाएमा राष्ट्रिय खेलकुद विकास ऐन, २०७७ र प्रचलित कानुन बमोजिम भइ जाने व्यहोरा समेत निर्णयानुसार जानकारीको लागि अनुरोध छ,’ पत्रमा भनिएको छ।

राखेपको संघ–संस्था समन्वय शाखाका प्रमुख चन्द्रकुमार राईले गत सोमबार एन्फालाई पत्र पठाउँदै परिषद्को स्वीकृतिबिना साधारण सभा (अर्डिनरी कंग्रेस) र निर्वाचनसम्बन्धी सम्पूर्ण काम तत्काल रोक्न निर्देशन दिएका थिए। तर, एन्फाले निर्वाचन प्रक्रिया नरोकेपछि राखेपभित्र असन्तुष्टि बढेको थियो। लगत्तै एन्फाले उक्त पत्र फुटबलको सर्वोच्च निकाय फिफा र एसियाली फुटबल महासंघ (एएफसी)लाई पठाएको थियो।

एन्फा स्रोतका अनुसार फिफा र एएफसीले जवाफ पठाइसकेको छ। तर, राखेप भने टसको मस नभएपछि एन्फा अध्यक्ष पंकजविक्रम नेम्वाङ र महासचिव किरण राईको दौडधुप बढेको छ।

राखेपले राष्ट्रिय खेलकुद विकास नियमावली २०७९ को नियम ७ (ग) तथा राष्ट्रिय खेलकुद विकास ऐन २०७७ को दफा २८ (ङ) अनुसार परिषद्को स्वीकृतिबिना कुनै पनि राष्ट्रिय खेलकुद संघले साधारण सभा तथा निर्वाचन गर्न नपाउने स्पष्ट व्यवस्था रहेको स्मरण गराएको छ।

यसअघि पनि राखेपले एन्फालाई प्रचलित कानुनअनुसार साधारण सभा सञ्चालन गर्न ११ बुँदे निर्देशन पठाएको थियो। तर, ती निर्देशनको पालना नगरी एन्फाले निर्वाचन तालिका सार्वजनिक गर्दै प्रक्रिया अघि बढाएको भन्दै एन्फाकै उपाध्यक्ष विराटजंघ शाही र केन्द्रीय सदस्य रुपेश अधिकारीले राखेपमा उजुरी दिएका थिए।

एन्फाले भने माघ २८ गते आगामी चार वर्षे कार्यकालका लागि निर्वाचन गर्ने भन्दै पहिलो तालिका सार्वजनिक गरेको थियो। निर्वाचन आचारसंहिताका कारण उक्त तालिका सरेपछि २२ फागुनमा पुनः नयाँ तालिका जारी गर्दै १३ चैतमा निर्वाचन गर्ने तयारी गरेको छ। निर्वाचन समितिले उजुरी तथा दाबी–विरोधको सुनुवाइपछि उम्मेदवारहरूको अन्तिम नामावलीसमेत सार्वजनिक गरिसकेको छ।

राखेपले उक्त प्रक्रियालाई तत्काल स्थगित गर्न र आवश्यक कागजी प्रक्रिया पूरा गरी तीन दिनभित्र जानकारी गराउन निर्देशन दिएको छ। अन्यथा, स्वीकृतिबिना गरिएको निर्वाचनलाई मान्यता नदिने स्पष्ट चेतावनी पनि दिइएको छ।