हारबाट मियामीले नयाँ सिजन सुरुआत

काठमाडौं। गत सिजन एमएलएस कप जितेर इतिहास बनाएको इन्टर मियामीले नयाँ सिजन भने हारबाट सुरु गरेको छ।

लिओनल मेसीको जादुमा पहिलो पटक लिग उपाधि चुमेको मियामी नयाँ सिजनको उद्घाटन खेलमै पराजित भएको हो।

एलए मेमोरियल कोलोसियममा आइतबार सम्पन्न एमएलएसको उद्घाटन खेलमा लस एन्जलस एफसीसँग ३–० ले पराजित भयो। पहिलो हाफमा डेविड मार्टिनेजले गोल गर्दै घरेलु टोलीलाई अग्रता दिलाएका थिए। दोस्रो हाफमा डेनिस बुआङ्गा र नाथान ओर्दाजले थप गोल गर्दै लस एन्जलसको जित सुनिश्चित गरे।

पूरा ९० मिनेट मैदानमा रहे पनि कप्तान मेसीले टोलीलाई खेलमा फर्काउन सकेनन्। खेलमा मियामी बल पोजेसनमा अगाडि रहे पनि आक्रमणमा कमजोर देखियो।

यस खेलमा मियामीले लुइस सुआरेजलाई बेन्चमा राख्दै ४–२–३–१ फर्मेसनमा खेलेको थियो। मेसी नम्बर १० को भूमिकामा थिए। उनको साथमा भेनेजुएलाका टेलास्को सेगोभिया र अर्जेन्टिनाका युवा मातेओ सिल्भेत्ती थिए भने अग्रपंक्तिमा नयाँ अनुबन्धित अर्जेन्टिनी खेलाडी हेर्मान बार्टेरामे थिए। तर, नयाँ आक्रमण पंक्तिबीच समन्वयको अभाव स्पष्ट देखिएको थियो।

३८औं मिनेटमा मार्टिनेजको गोलमा लस एन्जलसले अग्रता लिएको थियो। दोस्रो हाफमा पनि खेलको गति उस्तै रह्यो। ७३औं मिनेटमा बुआङ्गाले अग्रता दोब्बर बनाए। इन्जुरी समयको चौथो मिनेटमा ओर्दाजले अर्को गोल थप्दै मियामीको हार पक्का गरे।