पुलिसलाई हराउँदै गण्डकी फाइनलनजिक

हिमालयन मनोज, पोखरा। साबिक विजेता तथा विभागीय टोली नेपाल पुलिस क्लबमाथि सहज जित निकाल्दै गण्डकी प्रदेशले टाइगर कप भलिबल प्रतियोगिताको फाइनल पुग्ने सम्भावना कायम राखेको छ।

पोखरा रंगशालास्थित भलिबल कोर्टमा मंगलबार सम्पन्न खेलमा घरेलु टोली गण्डकीले ३–० को सोझो सेटमा जित हासिल गरेको हो। जितसँगै गण्डकीले चार खेलबाट ९ अंक पुर्‍याएको छ। पर्वत भलिबल संघको भने ८ अंक छ।

खेलको सुरुआतदेखि नै दबाबमा राखेको गण्डकीले पहिलो सेटमा २५–२२ को रोमाञ्चक जित निकाल्यो। दोस्रो र तेस्रो सेट भने २५–२० तथा २५–१४ ले आफ्नो बनाउँदै सहज जित हात पार्‍यो।