पुलिसलाई साेझाे सेटमा हराउँदै न्यु डायमण्ड च्याम्पियन

काठमाडौं। न्यु डायमण्ड एकेडेमीले एनभीए महिला तथा पुरुष भलिबल च्याम्पियनसिपअन्तर्गत महिलातर्फको उपाधि जितेको छ।

त्रिपुरेश्वरस्थित राष्ट्रिय खेलकुद परिषद् (राखेप)को कभर्डहलमा शनिबार सम्पन्न खेलमा विभागीय टोली नेपाल पुलिस क्लबलाई ३–० को सोझो सेटमा पराजित गर्दै न्यु डायमण्डले उपाधि जितेको हो।

दर्शकले भरिएको रंगशालामा भएको फाइनल खेल निकै रोमाञ्चक बनेको थियो। फाइनलमा न्यु डायमण्डले सुरुदेखि नै दबदबा कायम राख्दै पहिलो सेट २५–१८, दोस्रो सेट २५–१९ र तेस्रो सेट २५–१८ ले आफ्नो पक्षमा पार्‍यो।

उत्कृष्ट टिमवर्क, सशक्त आक्रमण र प्रभावकारी ब्लकिङका कारण न्यु डायमण्डले खेललाई पूर्ण रूपमा नियन्त्रणमा राख्न सफल भयो। पुलिसले संघर्षपूर्ण प्रदर्शन गरे पनि निर्णायक क्षणहरूमा अंक जोड्न नसक्दा उपविजेतामा सीमित रहनुपर्‍यो।

यस जितसँगै न्यु डायमण्ड एकेडेमीले प्रतियोगितामा आफ्नो वर्चस्व प्रमाणित गर्दै महिलातर्फको उपाधि हात पारेको छ।