टाइगर कपको पुरस्कार राशिमा वृद्धि, १४ टोलीको सहभागिता

पोखरा। छैटौं टाइगर कप राष्ट्रिय तथा अन्तर्राष्ट्रिय आमन्त्रित क्लब च्याम्पियनसिप महिला तथा पुरुष भलिबल प्रतियोगिताको पुरस्कार राशिमा वृद्धि गरिएको छ।

टाइगर ग्रुप अफ पोखरा नेपालको आयोजनामा नेपाल भलिबल संघको स्वीकृति तथा समन्वयमा प्रतियोगिता ९ देखि १७ माघसम्म पोखरा रंगशालामा आयोजना हुने तय छ।

भ्रमण वर्ष २०२५ तथा पर्यटनको राजधानी पोखरालाई केन्द्रमा राखेर आयोजना हुन लागेको यस प्रतियोगितामा महिला र पुरुष गरी कुल १४ टोली सहभागी हुनेछन्।

महिलातर्फ ७ र पुरुषतर्फ ७ टोलीले प्रतिस्पर्धा गर्नेछन्। प्रतियोगितामा नेपालका शीर्ष क्लबहरूसँगै थाइल्याण्ड, भारत र माल्दिभ्सका अन्तर्राष्ट्रिय टोलीहरूको समेत सहभागिता रहने आयोजक टाइगर ग्रुप अफ पोखराका अध्यक्ष नारायणप्रसाद शर्माले जानकारी दिए।

महिलातर्फ नेपाल पुलिस क्लब, नेपाल एपीएफ क्लब, त्रिभुवन आर्मी क्लब, टिपटप न्यू डायमन्ड युथ स्पोर्ट्स क्लब, एभरेस्ट भलिबल क्लब रुपन्देही, युनाइटेड प्यासन भलिबल क्लब (थाइल्यान्ड) र थाइल्यान्ड क्वीन्स सहभागी हुनेछन्।

पुरुषतर्फ गण्डकी प्रदेश भलिबल संघ पोखरा, नेपाल पुलिस क्लब, नेपाल एपीएफ क्लब, त्रिभुवन आर्मी क्लब, पर्वत जिल्ला भलिबल संघ, माल्दिभ्स भलिबल एसोसिएसन र गुजरात भलिबल क्लब (भारत) सहभागी हुनेछन्।

यस वर्ष प्रतियोगिताको पुरस्कार राशि गत वर्षको तुलनामा वृद्धि गरिएको छ। महिला तथा पुरुष दुवैतर्फ विजेता टोलीले ६ लाख ६६ हजार ६६६ रुपैयाँ प्राप्त गर्नेछन्। उपविजेता टोलीलाई ३ लाख ६६ हजार ६६६ रुपैयाँ र तृतीय हुने टोलीलाई १ लाख ६६ हजार ६६६ रुपैयाँ पुरस्कार प्रदान गरिने शर्माले जानकारी दिए।

साथै सर्वोत्कृष्ट खेलाडीलाई २६ हजार ६६६ रुपैयाँ प्रदान गरिनेछ भने विधागत उत्कृष्ट खेलाडीहरूलाई ११ हजार ६६६ रुपैयाँ बराबरको पुरस्कार व्यवस्था गरिएको छ।

यस प्रतियोगितामा पहिलो पटक भारत र माल्दिभ्सबाट अन्तर्राष्ट्रिय भलिबल रेफ्रीहरू सहभागी हुनेछन्। आयोजकका अनुसार प्रतियोगिता सञ्चालनका लागि करिब १ करोड ८० लाख रुपैयाँ खर्च लाग्ने अनुमान गरिएको छ।

टाइगर ग्रुप अफ पोखरा नेपालका अध्यक्ष नारायण प्रसाद शर्माको अध्यक्षतामा १०७ सदस्यीय मूल आयोजक समिति गठन गरिएको छ भने १४ वटा उपसमितिहरू बनाएर तयारीलाई तीव्रता दिइएको छ।