काठमान्डुमाथि जित हात पार्दै लुम्बिनी क्वालिफायर २ मा

काठमाडौं। इलिमिनेटरमा काठमान्डु गोर्खाजलाई हराउँदै लुम्बिनी लायन्स नेपाल प्रिमियर लिग (एनपीएल)को क्वालिफायर २ मा पुगेको छ।

बुधबार सम्पन्न इलिमिनेटरमा लुम्बिनीले ४ विकेटको जित हात पारेको हो। काठमान्डुले दिएको ११२ रनको लक्ष्य लुम्बिनीले १७.४ ओभरमा ६ विकेट गुमाउँदै पूरा गर्‍यो। योसँगै काठमान्डु प्रतियोगिताबाट बाहिरिएको छ।

लुम्बिनीले भने फाइनल प्रवेश गर्न विराटनगर किङ्सलाई चुनौती पेश गर्नेछ। क्वालिफायर १ मा साबिक उपविजेता सुदूरपश्चिम रोयल्ससँग विराटनगर ७७ रनले पराजित भएको थियो।

लुम्बिनीका डी'आर्सी जोन म्याथ्यूले सर्वाधिक ३३ रनको योगदान गरे। उनले ३४ बलमा २ छक्का प्रहार गरे। त्यस्तै, सन्दीप जोरा २३, कप्तान रोहित पौडेल १८, दिलीप नाथ ७, रुबेल ट्रप्मलम्यान ५ र दिनेश अधिकारीले ४ रन बनाए।

काठमान्डुका सन्तोष यादवले २ तथा कप्तान करण केसी, सन्नी पटेल, राशिद खान र शाहब आलमले समान १ विकेट लिए।