एनपीएलमा ५०० रन पूरा गर्ने पहिलो नेपाली ब्याटर बने रोहित

काठमाडौं। लुम्बिनी लायन्सका कप्तान रोहितकुमार पौडेल नेपाल प्रिमियर लिग (एनपीएल)मा ५०० रन पूरा गर्ने पहिलो नेपाली ब्याटर बनेका छन्।

बुधबार काठमान्डु गोर्खाजविरुद्धको इलिमिनेटरमा १८ रन बनाएसँगै उनले यो कीर्तिमान हात पारेका हुन्। उनले १५ इनिङ्समा ५०५ रन बनाएका छन्। यसक्रममा उनले २ अर्धशतक प्रहार गरेका छन्। उनी समग्रमा सर्वाधिक रनकर्ताको सूचीमा दोस्रो स्थानमा छन्।

उनीभन्दा अगाडि चितवन राइनोजका रवि बोपारा छन्। उनले समान इनिङ्समा ५२३ रन बनाएका छन्। यसक्रममा उनले ६ अर्धशतक प्रहार गरेका छन्।

रोहितले पहिलो संस्करणमा २ अर्धशतकसहित २७९ रन बनाएका थिए। यो संस्करणमा भने २२६ रन बनाएका छन्। यद्यपि, अर्धशतक प्रहार गर्न सकेका छैनन्।