काठमाडौं। भायानेट कर्पोरेट क्रिकेट लिग २०२५ को दोस्रो संस्करण आगामी भदौ दोस्रो साताबाट सुरु हुने भएको छ।
भेट्रान्स फोर्टी क्लबको आयोजना र ब्राण्ड लजिकको सहकार्यमा प्रतियोगिता भदौ १३ देखि १६ गतेसम्म बूढानीलकण्ठ नगरपालिका–१० स्थित रोयल स्पोर्ट्स पार्कमा आयोजना हुने भएको हो।
क्लबका अध्यक्ष सन्तोष भण्डारीका अनुसार दोस्रो संस्करणमा कुल २० कर्पोरेट टिमले सहभागिता जनाउनेछन्। हरेक खेल १० ओभरको हुनेछ। सहभागी टिमहरूलाई चार समूहमा विभाजन गरी लिग कम नकआउटमा खेलाइनेछ।
चार दिनसम्म चल्ने प्रतियोगितामा जम्मा ४७ खेल खेलाइने आयोजकले जानकारी दिएको छ। प्रतियोगिताका विजेता र उपविजेता टिमलाई आकर्षक ट्रफी प्रदान गरिनेछ।
साथै, उत्कृष्ट खेलाडी, उत्कृष्ट ब्याटर, बलर, फिल्डर, विकेटकिपर, सर्वाधिक छक्का तथा चौका प्रहार गर्ने खेलाडीहरूलाई छुट्टाछुट्टै पुरस्कार प्रदान गरिनेछ। फेयर प्ले टिम पनि सम्मानित हुनेछ।
