गोरखा एफसीले प्रतिभा पहिचान कार्यक्रम गर्ने

गोरखा। हिल्ली फिल्डर्स गोरखा एफसीले प्रतिभा पहिचान (खेलाडी छनोट) कार्यक्रम सञ्चालन गर्ने भएको छ।

कार्यक्रम संयोजक अमित खत्रीका अनुसार स्थानीय खेलाडीको प्रतिभा पहिचान तथा विकास गर्ने उद्देश्यले साउन १७ गतेदेखि ३० गतेसम्म गोरखास्थित द ओसन क्लबको कृत्रिम घाँसे मैदानमा कार्यक्रम गर्न लागिएको हो।

उनी भन्छन्,‘हामीले पहिलादेखि नै फुटबल खेल्न चाहने जो कोहीलाई नि: शुल्क प्रशिक्षण दिँदै आएका थियौं। तर, अब चाहिँ फुटबलर नै हुने गुण भएका खेलाडीको प्रतिभा पहिचान गरेर छनोट गर्ने तयारी गरिरहेका हौं।’ 

क्लबले ८ वर्षदेखि १४ वर्ष उमेर समूहभित्रका खेलाडीहरूलाई लक्षित गर्दै आगामी प्रशिक्षणका लागि छनोट प्रक्रिया सुरु गर्नेछ। छनोटपछि छानिएका खेलाडीलाई नियमित प्रशिक्षणमार्फत दीर्घकालीन रूपमा फुटबलमा दक्ष बनाउन योजना रहेको खत्रीले सुनाए। 

‘हामीले यु–१३ प्रतियोगिता पनि गर्दै आएका छौं। यसबाट छानिएका खेलाडी पनि नियमित प्रशिक्षण दिएर त्यो प्रतियोगिताका लागि तयार पार्ने छौं,’ उनी भन्छन्। कार्यक्रममा सहभागी हुन इच्छुक बालक खेलाडीहरूले साउन १६ गतेभित्र फारम बुझाइसक्नुपर्ने छ।