बीजीसीएल सुरु, पहिलो दिन ४ खेल सम्पन्न

काठमाडौं। बेलायतमा नेपाली समुदायबीच लोकप्रिय ‘ब्रिटिस गोर्खाली क्रिकेट लिग’ (बीजीसीएल) को छैटौँ संस्करण आजदेखि औपचारिक रूपमा सुरु भएको छ।

नेपाली मूलका खेलाडीहरूलाई व्यावसायिक क्रिकेट मञ्च प्रदान गर्ने उद्देश्यसहित आयोजना हुँदै आएको बीजीसीएलमा बेलायतभर रहेका विभिन्न नेपाली क्रिकेट क्लबहरूको सहभागिता रहेको छ।

प्रतियोगिताका खेलहरू हरेक आइतबार सञ्चालन हुने आयोजकले जनाएको छ।

आज सम्पन्न पहिलो साताको खेल तालिकाअनुसार खुकुरी सिसी र रमाइलो सिसी, माया सिसी र नेपालीज रोयल्स सिसी, नयाँ युवा सिसी र हिमालयन सिसी तथा एभरेस्ट राइनोज सिसी र साथी सीसीबीच खेल सम्पन्न भएको छ।

बीजीसीएल बेलायतमा नेपाली समुदायलाई लक्षित गरी ४० ओभरको ढाँचामा सञ्चालन हुने पहिलो तथा एक मात्र क्रिकेट लिग हो। हालसम्म पाँच सफल संस्करण सफलतापूर्वक सम्पन्न गरिसकेको लिग ह्याम्पशायर क्रिकेट बोर्ड, नेशनल एसियन क्रिकेट काउन्सिल र क्लब क्रिकेट कन्फरेन्ससँग आबद्ध छ।

आयोजकका अनुसार प्रतियोगिताले बेलायतमा रहेका नेपाली युवाहरूलाई क्रिकेटमार्फत एकताबद्ध गर्नुका साथै नेपाली क्रिकेटको विकास र प्रवर्द्धनमा महत्त्वपूर्ण भूमिका खेल्दै आएको छ। यस वर्षको संस्करण पनि प्रतिस्पर्धात्मक र आकर्षक हुने अपेक्षा गरिएको छ।

ब्रिज इन्टरनेशनल कन्सल्टेन्सी मुख्य प्रायोजक रहेको प्रतियोगिता मे १० देखि अगस्टसम्म सञ्चालन हुनेछ।