काठमाडौं। फ्रान्सको एनेसि सहरमा सम्पन्न टेनिस युरोप यु–१४ प्रतियोगिताको डबल्सतर्फ नेपाली खेलाडी शिवाली गुरुङले ऐतिहासिक सफलता हात पारेकी छन्।
उनी यो प्रतियोगिता जित्ने पहिलो नेपाली टेनिस खेलाडी बनेकी हुन्। शिवालीले अन्तर्राष्ट्रिय टेनिस महासंघ (आईटीएफ) र एसियाली टेनिस महासंघ (एटीएफ)को संयुक्त टिममा परेर युरोप भ्रमणको अवसर पाएकी थिइन्।
उनी युरोप भ्रमणमा छनोट हुने पहिलो नेपाली टेनिस खेलाडीसमेत हुन्। उनको यो जित नेपाली टेनिस इतिहासमै एक ठूलो उपलब्धि हो। हाल शिवाली एशिया यू–१४ बरियताको चौथो स्थानमा रहेकी छन्।
एनेसिपछि उनी अब बेल्जियम र जर्मनीमा आयोजना हुने यस्तै स्तरका अन्तर्राष्ट्रिय प्रतियोगितामा प्रतिस्पर्धा गर्नेछिन्।
यो यात्राले उनको अनुभव बढाउनुका साथै नेपाली टेनिसलाई अन्तर्राष्ट्रिय स्तरमा चिनाउने कार्यमा सहयोग पुग्ने विश्वास गरिएको छ।
