नेपाली टोलीका प्रशिक्षक भन्छन्– अन्तिम खेलमा खेलाडी थाके
काठमाडौं। नेपाली टोलीका मुख्य प्रशिक्षक यमप्रसाद गुरुङले साफ महिला यु-२० च्याम्पियनसिपमा उपविजेता बन्नुको मुख्य कारण थकान भएको तर्क गरेका छन्।
बढाकास्थित बसुन्धरा किङ्स एरिनामा सोमबार सम्पन्न लिग चरणको अन्तिम खेलमा नेपाल ४–० ले बंगलादेशसँग पराजित भएको थियो। त्यससँगै बंगलादेशले अपराजित यात्रा कायम राख्दै कुल १८ अंकसहित उपाधि जित्यो। नेपालले प्रतियोगिता अन्त्यसम्म ६ खेलमा १२ अंक जोड्दै दोस्रो स्थानमा चित्त बुझायो।
नेपाली टोली मंगलबार दिउँसो त्रिभुवन विमानस्थल झरेको हो। टोलीसँगै फर्किएका गुरुङले निरन्तरको खेल तालिका र मुख्य खेलाडीको थकानलाई हारको प्रमुख कारणको रूपमा देखाए। “हामीलाई जित्नैपर्ने दबाब थियो। त्यसैबीच पाँच वटा खेल २४–२४ घण्टाको फरकमा खेल्नुपर्यो,” उनले भने, “हाम्रो मुख्य समस्या के थियो भने मुख्य खेलाडीहरूलाई विश्राम मिलेन। थकान धेरै भयो।”
घरेलु टोली बंगलादेशले ९ जना सिनियर राष्ट्रिय टोलीका खेलाडी मैदानमा उतारेको थियो। अनुभवी खेलाडी, घरेलु मैदान र दर्शकको साथले बंगलादेशको प्रदर्शनमा ठूलो प्रभाव परेको उनले बताए।
प्रतियोगिताको समूह चरणमा प्रभावशाली प्रदर्शन गर्दै नेपाल उपाधि होडमा पुगेको थियो । तर, फाइनल जस्तै भएको अन्तिम खेलमा बंगलादेशसँगको पराजयले उपाधिसँगको दूरी कायम रह्यो।
