काठमाडौं। इङ्लिस प्रिमियर लिग क्लब न्यूक्यासल युनाइटेडका पूर्वस्टार नोलबर्टो सोलानो पाकिस्तानको सिनियर र यु–२३ राष्ट्रिय फुटबल टोलीको मुख्य प्रशिक्षक नियुक्त भएका छन्।
सोलानोले पूर्वप्रशिक्षक स्टेफन कोन्स्टन्टाइनको स्थान लिँदै जिम्मेवारी सम्हाल्नेछन्।
उनको पहिलो चुनौती सेप्टेम्बरमा हुने एएफसी यु–२३ छनोट प्रतियोगिता हुनेछ। पाकिस्तानले क्याम्बोडिया, इराक र ओमानसँग भिड्ने छ।
उनी पाकिस्तानको २०२७ एसियन कप छनोटका बाँकी खेलमा समेत टचलाइनमा हुनेछन्। यस क्रममा अक्टोबरमा अफगानिस्तानविरुद्धको डबल हेडर पनि पर्दछ।
सोलानोको नियुक्ति हालै निर्वाचित पाकिस्तान फुटबल महासंघ (पीएफएफ) अध्यक्ष मोहसिन गिलानीको कार्यकालको ठूलो निर्णय हो।
पीएफएफले सामाजिक सञ्जाल ‘एक्स’ मा लेखेको छ, ‘अध्यक्ष मोहसिन गिलानीको नेतृत्वमा पीएफएफले नोलबर्टो सोलानोलाई यु-२३ टोलीको मुख्य प्रशिक्षकको रूपमा स्वागत गर्दछ, जसको लक्ष्य सिनियर टोलीको नेतृत्वमा पुर्याउनु हो। विश्वकप, कोपा अमेरिका र प्रिमियर लिगको अनुभवसहित उनी साँच्चिकै एक महान् खेलाडी हुन्। यो पाकिस्तान फुटबलको नयाँ युग हो।’
सोलानो पेरु राष्ट्रिय टोलीका सहायक प्रशिक्षक थिए। पेरुले ३६ वर्षपछि पहिलोपटक २०१८ को रूस विश्वकपमा स्थान बनाउँदा उनी उक्त टोलीमा थिए। सन् २०२२ मा कतार विश्वकपको इन्टर-कन्टिनेन्टल प्लेअफमा अस्ट्रेलियासँग हार बेहोरेपछि उनले राष्ट्रिय टोली छाडेका थिए।
अघिल्ला प्रशिक्षक स्टेफन कोन्स्टन्टाइनले अक्टोबर २०२३ मा पाकिस्तानलाई इतिहासमै पहिलो पटक विश्वकप छनोट खेलमा जित दिलाएका थिए। एक वर्षे सम्झौता नोभेम्बरमा सकिएपछि उनी खेलका आधारमा टिमलाई प्रशिक्षण गर्दै आएका थिए।
