काठमाडौं। बसुन्धरा किङ्स एरिनामामा सोमबार साँझ साफ महिला यु-२० च्याम्पियनसिपमा जित मात्रै थिएन, त्यो मोसाम्मत सागोरिकाको आत्ममुक्तिको कहानी पनि थियो।
निलम्बनका कारण तीन खेल गुमाएकी १७ वर्षीया सागोरिका फाइनल खेलमा धमाकेदार रूपमा फर्किइन् र नेपालविरुद्ध ४-० को सानदार जित दिलाउँदै उपाधि दिलाइन्। ती चारै गोल उनले एक्लैले गरिन्।
ठाकुरगाउँकी यी फरवार्डले जुलाई १३ मा नेपालविरुद्धको पहिलो खेलमा रातो कार्ड पाएकी थिइन्। त्यतिखेरसम्म उनले एक गोल गरिसकेकी थिइन्। त्यो रातो कार्डसँगै उनी तीन खेलका लागि निलम्बित भइन्।
‘ती दिनहरू निकै पीडादायक थिए,’ उनले भनिन्,‘तर, मैले आफैंसँग बाचा गरेकी थिएँ फर्किन्छु। जब फर्किन्छु, सबैलाई देखाउँछु।’
खेल सुरु हुनुअघि बंगलादेशमा वायुसेनाको प्रशिक्षण विमान दुर्घटनामा निधन भएका व्यक्तिहरुप्रति सम्मान जनाउँदै एक मिनेट मौन धारण गरिएको थियो। त्यो क्षण गम्भीर थियो।
तर, त्यसपछि सुरु भयो सागोरिकाको तूफान। आठौं मिनेटमै नेपाली गोलकिपर सुजता तामाङलाई छक्याउँदै पहिलो गोल गरिन्। दोस्रो हाफको सुरुआतमै उनले पिरोएट गर्दै शक्तिशाली प्रहारमा दोस्रो गोल थपिन्।
उनको तेस्रो गोल सबैभन्दा कलात्मक थियो। गोलकिपर सुजताको माथिबाट ‘चिप’ गर्दै। योसँगै उनको प्रतियोगिताको दोस्रो ह्याट्रिक पूरा भयो। तर, उनी त्यत्तिमै रोकिइनन्। ७४ औं मिनेटमा टाढाबाट प्रहार गर्दै चौथो गोल गरेकी सागोरिकाले बंगलादेशलाई उपाधि दिलाउन मात्र होइन, आफूलाई पनि पुनःस्थापित गरिन्।
खेलपछि पत्रकार सम्मेलनमा उनी आफ्नो आत्मावलोकनमा थिइन्। ‘म साच्चै खुसी छु,’ उनले भनिन्, ‘म तीन खेल खेल्न सकिन, त्यो पीडादायी थियो। तर, मैले मनमनै भनेकी थिएँ जब फाइनल खेल्छु, उत्कृष्ट खेल्नेछु। टोलीका साथीहरूले पनि विश्वास दिएका थिए।’
रातो कार्डबारे कुरा गर्दा उनले स्वीकारिन्, त्यो बेला रिस थाम्न सकिनन्। तर, अब उनले मैदानमा शान्त रहनुपर्छ भन्ने सकिनेकी छन्। त्यसैले उनी भन्छिन्, ‘भविष्यमा यस्ता गल्ती दोहोर्याउँदिन।’
उनको प्रदर्शनले दुवै टिमका प्रशिक्षकहरूको ध्यान खिच्यो। बंगलादेशका प्रशिक्षक पीटर बटलरले भने, ‘सागोरिका अब राष्ट्रिय टोलीनजिक छिन्।’ नेपालका सहायक प्रशिक्षकले उनलाई यो क्षेत्रको उत्कृष्ट स्ट्राइकरमध्ये एक भने।
फाइनल जिते पनि बंगलादेशको ड्रेसिङ रुममा खुसी मिश्रित दुःख थियो। ढाकाको उत्तरामा भएको वायुसेनाको विमान दुर्घटनामा कम्तीमा २० जनाको मृत्यु र १७० भन्दा बढी घाइते भएको घटनाले त्यो क्षणलाई गम्भीर बनाएको थियो।
कप्तान आफेदा खाँडकारले भनिन्, ‘दुर्घटनाको खबरपछि हामी मैदानमा झर्यौं। धेरै बालबालिका घाइते भए। देशका जनताको अनुहारमा थोरै मुस्कान ल्याउन हामीले जित्नै पर्ने थियो।’
