हाउन्ड्सको लगातार दोस्रो जित
काठमाडौं। हाउन्ड्स एकेडेमीले हिमालयन जाभा बास्केटबल लिग (एचजेबीएल) मा लगातार दोस्रो जित हात पारेको छ।
कीर्तिपुर कभर्डहलमा मंगलबार भएको खेलमा हाउन्ड्सले टाइम्स बास्केटबल क्लबमाथि ८५–८१ को रोमाञ्चक जित दर्ता गरेको हो।
निकै प्रतिस्पर्धात्मक खेलमा हाउन्ड्स र टाइम्सले दुई–दुई क्वाटरमा अग्रता लिएको थियो। तर बाजी हाउन्ड्सले मार्यो।
टाइम्सले पहिलो क्वाटरमा २२–१९ ले आफ्नो पक्षमा पार्दै अग्रता लिएको थियो। तर दोस्रो क्वाटरमा हाउन्ड्सले पुनरागमन गर्यो र दोस्रो क्वाटर २६–२० ले आफ्नो पक्षमा पार्दै हाफ टाइमसम्म ४५–४२ को अग्रता बनायो।
तेस्रो क्वाटर पनि हाउन्ड्सले २८–१६ आफ्नो पक्षमा पार्दा ७३–५८ को अग्रता बनायो। १५ अंकले पछि परेको अवस्थामा पनि टाइम्सले चौथो क्वाटरपमा उत्कृष्ट प्रदर्शन गर्दै पुनरागमन प्रयास गरेको थियो। चौथो क्वाटर टाइम्सले २३–१२ ले आफ्नो पक्षमा पार्यो तर हार टार्न सकेन।
टाइम्सका लागि कप्तान सदिश प्रधानले सर्वाधिक २९ अंक स्कोर गरेपनि जिताउन सकेनन्। यस्तै विजयी टिम हाउन्ड्सका लागि सुजल खड्काले २१ अंक स्कोर गरे।
हाउन्ड्सका विजय बुर्जा लगातार दोस्रो खेलमा मोस्ट भ्यालुएबल प्लेअर घोषित भए। हाउन्ड्सले पहिलो खेलमा रोएल्सलाई पराजित गरेको थियो। टाइम्सको भने यो पहिलो हार हो।
पहिलो खेलमा टाइम्सले गोल्डेनगेट बास्केटबल क्लबलाई पराजित गरेको थियो। यस्तै मंगलबारै भएको दोस्रो खेलमा गोल्डेनगेट बास्केटबल क्लबलाई रोएल्सलाई ७९–७२ ले पराजित गरेको छ। गोल्डेनगेटको यो पहिलो जित हो भने रोएल्सको लगातार दोस्रो हार हो।
पहिलो क्वाटर रोएल्सले २०–१६ ले आफ्नो पक्षमा पारेपनि त्यसपछि गोल्डेनगेटले पुनरागमन गरेको थियो। दोस्रो क्वाटर गोल्डेनगेटले १७–१३ ले आफ्नो पक्षमा पारेपछि हाफ टाइमसम्म स्कोर ३३–३३ भएको थियो।
तेस्रो क्वाटर २३–२२ ले आफ्नो पक्षमा पारेको गोल्डेनगेटले अन्तिम क्वाटरअघि झिनो अग्रता लिएको थियो। चौथो क्वाटर पनि २३–१७ ले आफ्नो पक्षमा पार्दै गोल्डेगेटले खेल जित्यो।
गोल्डेगेटको जितमा निकेश मगरले सर्वाधिक २७ अंक स्कोर गरे। उनी मोस्ट भ्यालुएबल प्लेअर घोषित भए। रोएल्सका प्रसन ध्वज मास्केले २५ अंक स्कोर गरे।
लिगमा बुधबार सामाखुशी युथ क्लब कीर्तिपुरबीच प्रतिस्पर्धा हुनेछ। यी दुईबीचको पहिलो लिग खेलमा कीर्तिपुर विजयी भएको थियो।
६ टोली सहभागि लिग डबल राउण्ड रोविन प्रणालीमा सञ्चालन भइरहेको छ।
