ग्रिनफिल्ड, जेभियर, सिसिआरसी र गोल्डेन गेट सेमिफाइनलमा

काठमाडौं। हिसान सेन्ट्रल इन्टर कलेज बास्केटबल च्याम्पियनसिप २०२५ को सेमिफाइनल समीकरण पूरा भएको छ।

त्रिपुरेश्वस्थित राष्ट्रिय खेलकुद परिषद् (राखेप) कभर्डहलमा जारी प्रतियोगिताअन्तर्गत मंगलबार क्वार्टरफाइनलका खेल सम्पन्न भएसँगै अन्तिम चारमा पुग्ने टोलीको टुंगो लागेको हो। 

योसँगै पहिलो सेमिफाइनलमा ग्रिनफिल्ड इन्टरनेसनल कलेजले जेभियर इन्टरनेसनल कलेजको सामना गर्नेछ। अर्को सेमिफाइनलमा सिसिआरसीले गोल्डेन गेट इन्टरनेसनल कलेजलाई चुनौती पेस गर्नेछ।

सेमिफाइनल र फाइनल खेल बुधबार हुने आयोजकले जनाएको छ। मंगलबार सम्पन्न पहिलो क्वार्टरफाइनलमा ग्रिनफिल्डले वर्नहार्टलाई ६३–५१ को स्कोरमा पराजित गर्दै सेमिफाइनलमा प्रवेश गरेको छ। ग्रिनफिल्डको जितमा सोनम स्याङ्बो लामाले सर्वाधिक १७ स्कोर गरे। 

जेभियरले भने हेराल्ड इन्टरनेसनल कलेजलाई ७९–३४ को सहज स्कोरमा हराउँदै फाइनल प्रवेशका लागि ग्रिनफिल्डसँगको भेट पक्का गरेको छ।

गोल्डेन गेटले भने काठमाडौं वर्ल्ड स्कुललाई ६७–४२ को स्कोरमा पाखा लगायो। गोल्डेन गेटको जितमा दिवस भुजेलले १७ स्कोर गरे।