सफल पोखरा अन्तर्राष्ट्रिय म्याराथनको विजेताले ५ लाख पाउने

काठमाडौं। १९औं सफल पोखरा अन्तर्राष्ट्रिय म्याराथन फागुन पहिलो साता हुने भएको छ।

यो म्याराथन हरेक वर्ष फागुनको पहिलो साताको शनिबार हुँदै आएको छ। यसपल्ट पनि यसैलाई निरन्तरता दिँदै  फागुन ३ गते शनिबार गर्न लागिएको आयोजक आयोजक नेपाल भूतपूर्व खेलाडी मञ्चले जानकारी दिएको हो।

यो वर्ष पोखरा अन्तर्राष्ट्रिय म्याराथनअन्तर्गत १४ वटा क्याटोगरीहरू हुने छन् । जसअन्तर्गत खुला म्याराथन ४२.१९५ किमी, गण्डकी प्रदेशस्तरीय खुला म्याराथन ४२.१९५ किमी दौड, २१.०९७ किमी हाफ म्याराथन महिला / पुरुष दौड, महिला/पुरुष १० किमी दौड, विद्यालयस्तरीय छात्र / छात्रा ५ किमी दौड, ५० वर्षभन्दा माथि ५ किमी भेट्रान्स महिला/पुरुष दौड हुनेछन्। 

सँगै वर्षको एक दिन दौडिन पर्छ भन्ने सन्देश दिन रन फर फन पनि हुने आयोजकले जनाएको छ। पोखरा म्याराथनअन्तर्गत नै गत माघ २६ गते महिला/पुरुष ह्विलचियर तथा दृष्टिविहीन महिला/पुरुष दौड सम्पन्न भइसकेको छ।

खुला ४२.१९५ किमी म्याराथनको विजेताले ५ लाख रुपैयाँ प्राप्त गर्नेछन्। द्वितीयलाई ३ लाख, तृतीयलाई २ लाख र सान्त्वनास्वरूप चौथो देखि ८ जनासम्मलाई ३० देखि १० हजार प्रदान गर्ने आयोजकले जनाएको छ।