मदन भण्डारी भलिबलमा मणिमुकुन्द अन्तिम चारमा

रुपन्देही । रुपन्देहीमा जारी मदन भण्डारी गोल्डकप इन्डो नेपाल पुरुष भलिबल प्रतियोगिता पाचौं दिनको खेलमा मणिमुकन्द भलिबल क्लब अन्तिम चारमा स्थान बनाएको छ । 

आईतबार भएको निक्कै प्रतिस्प्रर्धात्मक खेलमा ३–२ को सेटमा जित निकाल्दै मणिमुकुन्द अन्तिम चारमा स्थान बनाएको हो । दोस्रो खेलमा गुजरात भलिबल क्लबले गल्कोट भलिबल क्लबलाई पराजित गरेको छ । गुजरातको यो प्रतियोगितामा दोस्रो जित हो ।

रामनगर खेलमैदानमा भएको पहिलो निक्कै प्रतिस्प्रर्धात्मक खेलमा मणिमुकुन्द भलिबल क्लबले २५–२० अंकसहित जित निकाल्दै खेलमा अग्रता लिएको थियो । तर दोस्रो सेट भने आयोजक मदन भण्डारीले २५–१८ मा आफनो पोल्टामा पार्दै खेल बराबरीमा ल्यायो ।

चर्चित युवा खेलाडीसहित मैदानमा उत्रेको आयोजक मदन भण्डारीलाई तेस्रो सेटमा २५–१२ अंकको साथ हराउँदै मणिमुकुन्दले खेलमा फेरि अग्रता लियो ।

चौथौ सेट भने खेलमा फर्किदै आयोजक मदन भण्डारीले २५–२० अंकका साथ जित निकाल्दै खेल पुनः बराबरीमा ल्याउन सफल भयो । अन्तिम तथा निर्णायक सेट मणिमुकुन्दले १५–१२ अंकको जित निकाल्दै खेल आफनो पक्षमा पारेको थियो ।

दोस्रो खेलमा गुजरात भलिबल क्लबले विदेशी खेलाडीसहित मैदानमा रहेको गल्कोट भलिबल क्लबलाई ३–० को सेटमा पराजित गरेको छ । एकतर्फी खेलमा गुजरातले २५–१८, दोस्रो सेट २५–१९ र २५–१६ को सोझो सेटमा पराजित गरेको हो । 

सोमबार पहिलो खेलमा विभागिय टिम नेपाल पुलिस क्लबले रुकुम भलिबल क्लब तथा दोस्रो खेलमा विभागिय टिम त्रिभुवन आर्मी क्लब र शस्त्रप्रहरी बल एपीएफ क्लबको सामना गर्नेछन् ।