काठमाडौं। डिफेन्डिङ च्याम्पियन बंगलादेशले दशरथ रंगशालामा आइतबार पाकिस्तानविरुद्ध प्रतिस्पर्धा गर्दै साफ महिला च्याम्पियनसिपमा उपाधि रक्षाको अभियान थाल्दै छ। सेमिफाइनल प्रवेशका लागि महत्त्वपूर्ण मानिएको यो खेल आज साँझ ५ः३० बजे सुरु हुनेछ।
पाकिस्तानले समूह ‘ए’ को पहिलो खेलमा भारतविरुद्ध सुधारिएको खेल पस्किएको थियो। खेल ५–२ ले हार पनि पाकिस्तानले अघिल्लो संस्करणको तुलनामा निक्कै सुधार गरेको साबित गरेको थियो। त्यसैले उसले बंगलादेशलाई पनि कडा चुनौती दिने अपेक्षा गरिएको छ।
तीन देश रहेको समूहमा पाकिस्तानको यो दोस्रो तथा अन्तिम खेल हुनेछ, जसले नकआउट प्रवेशका लागि उसको भाग्य निर्धारण गर्नेछ। जित वा बराबरी नतिजाले मात्रै अन्तिम चारमा पाकिस्तानको सम्भावना कायम रहनेछ।
यदि पाकिस्तानलाई पराजित गरेमा बंगलादेशले एक खेल बाँकी छँदै सेमिफाइनलमा स्थान पक्का गर्नेछ र यस्तो नतिजामा भारतको पनि अन्तिम चारको यात्रा निश्चित हुनेछ। त्यसैले सेमिफाइनल समीकरणको लागि बंगलादेशविरुद्ध पाकिस्तानको खेल निर्णायकजस्तै वा निक्कै महत्त्वपूर्ण रहेको छ।
बंगलादेशकी कप्तान सविना खातुनले पनि पाकिस्तानविरुद्धको खेल सहज नहुने बताएकी छन्। उनी भन्छिन्, ‘पाकिस्तान विगतको साफभन्दा राम्रो भएर आएको छ। उसले भारतलाई कडा चुनौती दिएको हामीले देखेका छौं। त्यसैले पाकिस्तानविरुद्ध हामीलाई सजिलो हुने छैन। र, यो खेल चुनौतीपूर्ण हुनेछ।’
अनुभवी र महत्त्वपूर्ण दुई खेलाडी स्वप्ना र आँखीको अनुपस्थितिमा नयाँ खेलाडीले पनि राम्रो प्रदर्शन गर्नसक्ने कप्तान सविनाको विश्वास छ। बंगलादेशको अग्रपंक्तिको मुख्य हतियार यिनै कप्तान हुन्। र, उनको पूरा टिमले उत्कृष्ट प्रदर्शन गर्दै दुई वर्षअघि फाइनलमा घरेलु टिम नेपाललाई ३–१ ले हराएर बंगलादेश पहिलोपल्ट साफ च्याम्पियन भएको थियो। उक्त साफको समूह चरणको भेटमा बंगलादेशले सविनाको ह्याट्रिकको सहयोगमा पाकिस्तानलाई ६–० ले पराजित गरेको थियो।
.jpg)
