न्युजिल्यान्डविरुद्ध खेल्ने अफगानी टोलीमा तीन नयाँ खेलाडी

काठमाडौं। अफगानिस्तानले न्युजिल्यान्डविरुद्धको एकमात्र टेस्टका लागि १६ सदस्यीय टोलीमा तीन नयाँ खेलाडीलाई समावेश गरेको छ। जसमा ओपनिङ ब्याट्सम्यान रियाज हसन, अफ स्पिन अलराउन्डर शम्स उर रहमान र फास्ट बलर खलील अहमद रहेका छन्। यो टेस्ट ९ सेप्टेम्बरबाट ग्रेटर नोएडामा सुरु हुँदैछ।

चोटका कारण लामो ढाँचाबाट बाहिर रहेका राशिद खानको स्थानमा जहिर खान र जिया–उर–रहमानले अफगानको स्पिन विभाग सम्हाल्नेछन्। राशिदले आयरल्यान्डविरुद्धको अन्तिम टेस्टमा पनि भाग लिएका थिएनन्, जुन फेब्रुअरी–मार्चमा खेलिएको थियो।

उक्त टेस्टमा पाँच विकेट लिने फास्ट बलर नाभिद जाद्रान साइड स्ट्रेनका कारण मैदान बाहिर हुनुपरेको थियो। युएईमा हुने दक्षिण अफ्रिकाविरुद्धको सिरिका लागि पूर्ण रूपमा फिट हुनका लागि उनलाई कम्तिमा तीनदेखि चार साता आराम गर्न सल्लाह दिइएको छ।

यसबाहेक गुलबदिन नाइब, फरीद अहमद र यामा अरब पनि यस टोलीमा छैनन्। उनीहरूले गत महिना घोषणा गरेको २० सदस्यीय टोलीमा स्थान बनाएका थिए। टोलीमा इक्रम अलीखिल र अफसर जाजाई दुई विकेटकिपर ब्याट्सम्यान छन्।

अफगानिस्तान टोली
हशमतुल्लाह शाहिदी (कप्तान), इब्राहिम जद्रान, रहमत शाह, अब्दुल मलिक, रियाज हसन, अफसर जाजई (विकेटकीपर), इक्रम अलीखिल (विकेटकीपर), बहिर शाह, शहीदुल्लाह कमाल, अजमातुल्लाह ओमरजाई, शम्स उर रहमान, जिया उर रहमान, जहीर खान, कैस अहमद, खलील अहमद, निजात मसूद