टियु बिबिएम कप फुटसल मंगलबारदेखि

काठमाडौं। टियु बिबिएम कप फुटसल प्रतियोगिताको पाँचौं संस्करण मंगलबारदेखि  हुनेभएको छ।

आयोजक स्वतन्त्र विद्यार्थी युनियन(स्ववियु), शंकरदेव क्याम्पसले सोमबार पत्रकार सम्मेलनमार्फत प्रतियोगिताको बारेमा जानकारी गरायो। 

चन्द एन्ड ब्रदर्स प्रा.लिको व्यवस्थापनमा हुन लागेको प्रतियोगिताका खेलहरू बाँसबारीस्थित चौर रिक्रिएसन सेन्टरमा खेलाइने छ। तीन दिने प्रतियोगिताको उद्घाटन पूर्व परराष्ट्रमन्त्री प्रकाश शरण महतले गर्नेछन्।

प्रतियोगितामा त्रिभुवन विश्वविद्यालयअन्तर्गत व्यापार व्यवस्थापनमा स्नातक गरिरहेका विद्यार्थीले मात्र सहभागिता जनाउन पाउने छन्। प्रतियोगितामा सहभागी २० टोलीलाई चार समूहमा विभाजन गरिएको छ। प्रत्येक समूहका शीर्ष दुई टोलीले क्वार्टरफाइनलमा स्थान बनाउने छन्।

प्रतियोगिताको विजेताले ७५ हजार र उपविजेताले ४० हजार रुपैयाँ प्राप्त गर्ने आयोजकले जनाएको छ।  यसै गरी सर्वोत्कृष्ट खेलाडीलाई १ हजार ५०० तथा विधागत उत्कृष्टलाई ट्रफी प्रदान गरिनेछ।

शंकरदेव क्याम्पस प्रतियोगिताको साबिक विजेता हो। प्रतियोगितालाई त्रिभुवन विश्वविद्यालयले प्राविधिक सहयोग गर्नेछ।