काठमाडौँ। फाल्डो जुनियर टूर नेपाल च्याम्पियनसिपको दोस्रो दिन सद्भाव आचार्य, सिद्धान्त सापकोटा र आइन्स्टिना टण्डन आ-आफ्नो उमेर समूहमा शीर्ष स्थानमा रहेका छन्।
रोयल नेपाल गल्फ क्लबमा भएको च्याम्पियनसिपअन्तर्गत पुरुष १७ देखि २१ वर्ष उमेर समूहमा राष्ट्रिय टिमका सदस्य सद्भाव आचार्यले ५-ओभर ७३ को स्कोर दर्ज गरे।
समग्रमा इभन-पार १३६ सहित ३६ होलको समाप्तिमा सद्भावले संसार विकेलाई १७ स्ट्रोकको फराकिलो अन्तरमा पछि पारे। यो स्कोरमा सद्भावले उपाधि जित्दै फाल्डो सिरिज एशिया फाइनलमा छनोट हुने सम्भावनालाई बलियो बनाएका छन्।
पहिलो दिनको तुलनामा सद्भावले आज खेल बिगारे। पहिलो होलमा नै डबल बोगीको सामना गरे। चौथो होलमा एक सट बचाए भने सातौँ होलको बोगीले फ्रन्ट नाइन २-ओभर ३६ मा सकाए। यसपछि १०औँ होलमा बर्डी प्रहार गरे पनि ११औँ, १२औँ, १३औँ र १७औँ होलमा एक-एक सट खेर फाले। ब्याक नाइन सद्भावले ३-ओभर ३७ मा पूरा गरे।
दोस्रो स्थानमा रहेका संसारले आज ९ ओभर ७७ मा सकाउँदा समग्रमा १७-ओभर १५३को स्कोर दर्ज गरे। उनले फ्रन्ट नाइन ४-ओभर ३८ र ब्याक नाइन ५-ओभर ३९ मा खेल पूरा गरेका हुन्। समग्रमा २३-ओभर १५९ सहित स्वप्निल भट्टराई तेस्रो स्थानमा छन्। उनले आज १३-ओभर ८१ मा खेल सकाए।
च्याम्पियनसिपको पुरुष १२ देखि १६ वर्ष उमेर समूहमा सिद्धान्त सापकोटा समग्रमा २२-ओभर १५९ सहित शीर्षस्थानमा उक्लिएका छन्। उनले दोस्रो दिनको खेल १७-ओभर ८५ मा सकाए। यो स्कोरमा उनले सोहम अग्रवाललाई ६ स्ट्रोकले पछि पारेका छन्। सोहमले आज २०-ओभर ८८ खेल्दा समग्रमा ४१-ओभर १ सय ७७ स्कोर दर्ज गरे। पहिलो दिनका लिडर इदकान्त सिंह साउद समग्रमा ४३-ओभर १७९ सहित तेस्रो स्थानमा झरे। उनले आज २७-ओभर ९५ मा खेल पूरा गरे।
महिलातर्फ आइन्स्टिना टण्डन समग्रमा ३३-ओभर १७५ सहित शीर्षस्थानमा उक्लिएकी छिन्। उनले अवानी राईलाई सात स्ट्रोकले पछि पारिन्। आइन्स्टिनाले आज १४-ओभर ८२ को स्कोर कार्ड तयार पारिन्। समग्रमा ४६-ओभर १८२ सहित अवानी दोस्रो स्थानमा झरिन। उनले आज २६-ओभर ९४ मा खेल सकाइन्।
-1750064258.webp)
-1750047432.webp)
