गण्डकी सरकारले क्रिकेट रंगशाला निर्माण गर्ने

पोखरा। गण्डकी प्रदेश सरकारले दुई जिल्लामा प्रादेशिकस्तरीय क्रिकेट रंगशाला निर्माण गर्ने घोषणा गरेको छ।

गण्डकी प्रदेशको मन्त्रीपरिषद्को चैत्र ९ गते बसेको बैठकले उक्त निर्णय गरेको हो। बैठकले नवलपुरको कावासोती नगरपालिका–२ नवदुर्गा खेल मैदान र तनहुँ शुक्लागण्डकी–८ गाउँफर्कोदय माविको खेल मैदानलाई प्रदेशस्तरीय क्रिकेट खेल मैदान निर्माण गर्ने निर्णय गरेको प्रदेश खेलकुद परिषद्का सदस्यसचिव श्रीधर शर्माले जानकारी दिए।

प्रादेशिकस्तरीय क्रिकेट रंगशाला र एक अन्तर्राष्ट्रिय क्रिकेट रंगशाला निर्माण प्रक्रिया अघि बढाउन परिषद्ले जिल्लाका विभिन्न ६ स्थानका सिफारिस गरेको सदस्यसचिव शर्माले बताए। 'हामीले समिति नै गठन गरेर अध्ययन गरेका थियौँ। सोही अध्ययनको आधारमा सरकारले दुई स्थानमा प्रादेशिकस्तरीय रंगशाला निर्माण हुनेगरी मन्त्रीपरिषद्ले निर्णय गरेको छ,' उनले भने।

प्रादेशिकस्तरीय क्रिकेट रंगशाला निर्माणका लागि एक रंगशालाबाट अर्को रंगशालाको दुरी कम्तीमा ४० किमीभित्र हुनुपर्ने प्रावधान रहेको छ।  नवलपुरको कावासोतीस्थित नवदुर्गा खेल मैदानबाट नेपालकै गौरवको अन्तर्राष्ट्रिय गौतमबुद्ध क्रिकेट रंगशाला ४० किमीभित्र पर्छ। उक्त स्थानमा प्रादेशिक क्रिकेट रंगशाला उपयुक्त हुनेगरी मन्त्रीपरिषद्ले निर्णय गरेको सदस्य सचिव शर्माले बताए। 

'गौतमबुद्ध अन्तर्राष्ट्रिय क्रिकेट रंगशालाका लागि पनि नजिकमा पर्ने अर्को रंगशाला आवश्यक पर्छ। सबै कुराले कावासोती उपयुक्त पनि छ,' सदस्यसचिव शर्माले भने।

त्यसैगरी शुक्लागण्डकीको गाउँफर्कोदय माविको खेल मैदानसमेत पोखरा क्रिकेट रंगशालाबाट ४० किमी भित्रै पर्ने भएकोले उक्त स्थानसमेत क्रिकेट मैदान निर्माणका लागि मन्त्रीपरिषद्ले निर्णय गरेको शर्माले जानकारी दिए। प्रदेश सरकारद्वारा विनियोजित ४० लाख रुपैयाँ सोही मैदान निर्माण प्रक्रियाका लागि अघि बढाउने जनाएको छ।

'यी दुवै स्थान प्रादेशिक क्रिकेटका लागि उपयुक्त छन्। कावासोतीका लागि त्यहाँको नगरपालिकाले २ सय रोपनी जग्गाका लागि स्वीकृत दिएको छ भने शुक्लागण्डकीको लागि गाउँफर्कोदय माविको स्वामित्वमा रहेको करिब १७३ रोपनी जग्गाको समेत स्वीकृति प्राप्त भएको छ,' उनले भने।

परिषद्ले कार्यकारी सदस्य ऋषिराम गौतमको संयोजकत्वमा परिषद्का कार्यकारी सदस्य तारामाया थापामगर, सदस्यहरू केशव पाठक र विष्णुमाया गुरुङ, कार्यालय प्रमुख तोपलाल भुसाल र लेखा प्रमुख नीलकण्ठ ढकालसहितको क्रिकेट रंगशाला सम्भाव्यता अध्ययन टोली गठन गरेको थियो। 

टोलीले जिल्लाका विभिन्न स्थलको अध्ययन अवलोकनसँगै स्थानीय सरोकारवालाहरूसँग छलफल गरेर पोखरा महानगर पालिका– १४ भेडीफर्ममा अन्तर्राष्ट्रिय क्रिकेट रंगशाला र अन्य पाँच स्थानमा प्रादेशिक क्रिकेट रंगशाला निर्माणका लागि सिफारिस गरेको थियो।

तर, पोखरा १४ स्थित भेडीफर्मको जग्गाको विषयमा कुनै निर्णय भएको छैन। त्यसैले सोबारे मन्त्रीपरिषद्ले कुनै निर्णय भने गर्न सकेको छैन। यता परिषद्ले नेपाल सरकारको कृषि मन्त्रालय अन्तर्गत रहेको उक्त जग्गा भेडीफर्मको चरण एरियासमेत भएकोले हस्तान्तरणका लागि लामो प्रक्रिया अपनाउनु पर्ने भएकोले परिषद्ले सोको विकल्पमा नयाँ स्थानको खोजी कार्य तीव्र रूपमा अघि बढाएको अध्ययन टोलीका संयोजक शर्माले बताए।