एनआईएमबीलाई आरआरबीएल–इसान कप

काठमाडौँ- नेपाल इन्भेष्टमेन्ट मेगा बैँक (एनआईएमबी)ले दोस्रो पटक आरबीबीएल–इसान कप तेश्रो फुटसल प्रतियोगिताको उपाधि जितेको छ।

राष्ट्रिय वाणिज्य बैंकको मुख्य प्रायोजनमा कर्मचारी खेलकुद प्रतिष्ठान नेपाल (इसान) द्वारा आयोजित प्रतियोगिताको फाइनलमा सोमबार एनआईएमबीले नेपाल आयल निगमलाई २–० गोलले पराजित गर्दै उपाधि जितेको हो। एनआईएमबीको जितमा दुवै गोल सुलभ थापाले गरे।

उपाधिसँगै एनआईएमबीले ५० हजार नगद पुरस्कार पायो। आयल निगमले ३० हजार नगद पुरस्कार प्राप्त गर्‍यो।
आयल निगम फाइनलमा पराजित भएको यो लगातार दोश्रोपटक हो। दोश्रो संस्करणको फाइनलमा आयल निगम नेपाल नागरिक उड्डयन प्राधिकरणसँग पराजित भएको थियो। पहिलो संस्करणको उपाधि एभरेष्ट बैंक लिमिटेडले जितेको थियो।

सोल्टीमोडस्थित चैत्य फुटसलमा भएको प्रतियोगितामा नेपाल बैंक लिमिटेड तेस्रो भयो। नेपाल बैंकले काठमाडौँ उपत्यका खानेपानी लिमिटेडलाई २–० गोलले हरायो। रञ्जन बराल र सुदीप सुवेदीले समान १–१ गोल गरे। नेपाल बैंकले २० हजार नगद पुरस्कार हात पार्‍यो।

प्रतियोगिताभर ९ गोल गरेका एनआईएमबीका सुलभ थापा सर्वाधिक गोलकर्ता बने। एनआईएमबीकै सगुनकुमार मोक्तान उत्कृष्ट गोलरक्षक घोषित भए। राष्ट्रिय वाणिज्य बैंकले अनुशासित टिमको उपाधि हात पार्‍यो।