काठमाडौं । विश्व विजेता जर्मनीले हारबाट रुसी बिश्वकपको यात्रा सुरुवात गरेको छ । विश्वकप विजेता पहिलो खेलमै पराजित हुने इतिहासमा जर्मनीले समेत नाम लेखाएको छ । यसअघि तीन राष्ट्रले भोगेको नियति जर्मनीले समेत व्यहोरेको छ ।
पहिलो खेलमा १–० ले हारेको जर्मनी विश्व बिजेताको ताज जोगाउन र नकआउट चरण पुग्न बाँकी खेलमा सुखद नतिजा निकाल्नै पर्ने बाध्यतामा छ । उसले अब स्विडेन र साउथ कोरियासंग प्रतिस्पर्धा गर्नेछ ।
एसियाली टोली साउथ कोरियालाई १–० गोलले पाखा लगाएको स्विडेन र जर्मनलाई हारको स्वाद चखाएको मेक्सिको ३ अंक सहित समुहको शीर्ष स्थानमा रहदाँ विश्वकप विजेता जर्मनी तालिकाको पुछारमा बस्न बाध्य छ ।
समुहको शीर्ष दुई भित्र रहेका मेक्सिको र स्विडेनलाई बराबरी नतिजाले पनि नकआउट चरणसम्म पुर्र्याउन सक्छ, समिकरणले त्यस्तै भन्छ ।
पहिलो खेलमा जर्मनी केही हदसम्म निरीह देखिएको थियो । लाग्थ्यो, जर्मनले अभ्यास खेल खेलिरहेको छ । ३४ औ मिनेट जादाँ मेक्सिकोका हिर्भिङ लोजानोले बललाइ जर्मनको पोस्टभित्रको दिशा दिन सफल भएपछि जर्मनी बिउझिए जस्तो देखियो । तर, उसले खेलमा फर्कने कोशिश गरेपनि मेक्सिकोको डिफेन्स र गोलरक्षकका अगाडि आत्मसमर्पण गर्न बाध्य भयो ।
जर्मनीको हारको कारण हो, अर्को टिमलाई कमजोर सम्झने 'उच्च कन्फिडेन्स' । जसको झलक २०१४ मा देखिएको थियो । सर्बियालाई कमजोर आँक्दा जर्मनले खेल हारेको थियो । त्यही नतिजा रुसी विश्वकपको पहिलो खेलमा देखिएको छ ।
अब हुने खेलहरुमा आफ्नो पुराना गल्तीबाट सिकेर जर्मनीले यसलाई सुधार गर्दै विश्व बिजेताको रुपमा प्रस्तुत हुनु जरुरी छ । समुहको दोस्रो खेलमा जर्मनीले आज मध्यरातमा स्विडेनसंग भिड्दै छ । ३ अङ्क पाएको स्विडेन रक्षात्मक खेल्दै खेललाई बराबरीतर्फ मोड्न सक्छ । किनकी खेल बराबर गरेर १ अङ्क मात्र लिदाँ उसको नकआउटमा पुग्ने सम्भावना बलियो रहन्छ ।
जर्मनीसंग आक्रमक खेल्दा अंक गुमाउने डर बोेकेको स्विडेनलाई रक्षा पङ्ती बलियो बनाउदै गोलको अवसर सिर्जना गर्नु बढी बुद्धिमक्ता हुनेछ । आफूसंग भएको राम्रो मिडफिल्डलाई प्रयोग गरि खेलमा आक्रमक बन्नु जर्मनीको एक विकल्प हो । तर, यसरी अघि बढ्दा आफ्नो रक्षापङ्तिमा समेत जर्मनीले ध्यान दिनु पर्ने देखिन्छ ।
अघिल्लो खेलमा जस्तो जर्मनीको रक्षापङ्ती खुकुलो भए स्विडेनका लागि उपयुक्त अवसर हुन सक्छ । बिश्वकपमा लयमा फर्कन र उपाधि रक्षा गर्न जर्मनीले फरवार्ड लाईनमा सुधार गर्दै मिडफिल्डका टोनी क्रुस, मेसुट ओजिल लगायतका खेलाडीको उपयुक्त प्रयोग गर्नुपर्ने हुन्छ ।
तस्विर: एजेन्सी
-1751975074.jpeg)
