भारत र पाकिस्तानसँग राम्रो क्रिकेट खेल्छौ - रोहित

काठमाडौं । नेपाली राष्ट्रिय क्रिकेट टोलीका कप्तान रोहितकुमार पौडेलले भारत र पाकिस्तानविरुद्ध राम्रो क्रिकेट खेल्ने विश्वास व्यक्त गरेका छन् ।

एसिया कपमा सहभागी हुन मंगलबार पाकिस्तान जानु अघि भएको पत्रकार सम्मेलनमा भारत र पाकिस्तानसँग आफुहरुले राम्रो क्रिकेट खेल्ने बताए । 

'हामी भारत र पाकिस्तानको समूहमा छौ । पहिलो पटक उनीहरुसँग खेल्दै छौ । सबै जना उत्साहित छौं ',पौडेलले भने 'सबै जनाले राम्रो तयारी गरेका छौं । नतिजा हाम्रो हातमा छैन । तर, कस्तो खेल्ने भन्ने हाम्रो हातमा रहेकोले सबैले राम्रो खेल्न सकेको प्रयास गर्ने छौं ।'

क्रिकेटको खेलमा नतिजा जस्तो पनि आउन सक्ने समेत पौडेलले बताए । 

सन्दीपको एसिया कपमा सहभागिताबारेमा आफुले अहिले पूरा जानकारी नरहेको उहाँ सहभागीता नहुने हो भने टिममा ठुलो फरक पर्ने समेत रोहितले बताए । 

आगामी भदौ १३ मा पाकिस्तानविरुद्ध खेल्दै नेपालले एसिया कपमा डेब्यू पनि गर्दै छ। नेपाली टोली एसिया कपमा सहभागी हुन आज राती त्यस तर्फ जादै छ । नेपालले एसिया कपको अन्तिम तयारी पाकिस्तानमा नै गर्ने छ । 

समूह चरणको दोस्रो खेलमा भदौ १८ मा भारतसँग खेल्दै छ । प्रतियोगितामा नेपालले पहिलो पटक सहभागीता जनाउदै छ । प्रतियोगितामा नेपाल सहित छ देशले सहभागीता जनाउदै छ । सहभागी छ देशलाई दुई समूहमा विभाजन गरिएको छ । 

भारत र पाकिस्तानसँग नेपाल समूह ए मा रहेको छ । समूह बी मा अफगानिस्तान, श्रीलंका र बंगलादेश रहेका छन् ।