नेपाली टोलीको घोषणा चाँडै हुन्छ - पाठक

काठमाडौं । तीन सातापछि पाकिस्तान र श्रीलंकामा हुने एसीसी एकदिवसीय एसिया कप खेल्ने नेपाली टोलीको घोषणा केही दिनमा नै हुने भएको छ । 

नेपाल क्रिकेट संघ (क्यान) का कार्यवाहक सचिव दुर्गाराज पाठकका अनुसार नेपाली टोलीको घोषणा केही दिनमा नै हुने बताए । 

'हामी पाकिस्तान कहिले जाने अझै टुङ्गो लागेको छैन । टिममा १७ जना जाने हो । हामी नाम एक दुई दिनमा सार्वजनिक गछौं ’, पाठकले खेलपाटीसँग भने 'अन्तिम तयारीका लागि हामी केही दिन अघि नै पाकिस्तान पुग्ने तयारी गरिरहेका छौं ।'

पाठकका अनुसार नेपालले एसिया कप खेल्ने अन्तिम टोली टुंगो लगाई सकेको छ । 

एसिया कप अगष्ट ३० देखी सेप्टेम्बर १७ सम्म पाकिस्तान र श्रीलंकामा हुनेछ । समूह ए मा भारत, पाकिस्तान र नेपाल छन् । समूह बी मा बंगलादेश, श्रीलंका र अफगानिस्तान छन् । 

नेपालले पहिलो खेल ३० अगष्टमा पाकिस्तानसँग मुल्तानमा खेल्नेछ । दोस्रो खेल ४ सेप्टेम्बरमा श्रीलंकाको केन्डीमा भारतसँग खेल्ने हुनेछ ।