काठमाडौं । दोस्रो संस्करणको किंग्स कप पुरुष भलिबल प्रतियोगिताको तयारी अन्तिम चरणमा पुगेको छ ।
साउन २३ बाट सुरु हुने प्रतियोगिताको सम्पुर्ण तयारी अन्तिम चरणमा पुगेको आयोजक किंग्स क्लबले बताएको छ ।
शनिबार आयोजित पत्रकार सम्मेलनमा क्लबका अध्यक्ष अञ्चल शाहीले प्रतियोगितामा ८ देखि १० क्लबको सहभागीता रहने बताउनु भयो ।
नेपाल भलिबल संघको स्विकृतीमा हुने यस प्रतियोगितामा संघले प्राविधिक सहयोग प्रदान गर्ने प्रेस विज्ञप्तीमा बताईएको छ ।
क्लबका महासचिव लक्ष्मण काप्रीका अनुसार साउन २० गतेसम्म टिम दर्ताको समय रहेको छ । उनका अनुसार साउन २२ गते सोमबार प्रतियोगिताको खेलतालिका सार्वजनिक गरिने छ ।
क्लबका अनुसार प्रतियोगिताको अनुमानित बजेट १७ लाख रहेको छ । काप्रीका अनुसार पुरस्कार तर्फ मात्र ४ लाख रकम खर्च हुनेछ ।
किंग्स क्लब काठमाडौंको आयोजनामा हुने प्रतियोगिता साउन २३ बाट २७ गतेसम्म आयोजना हुनेछ ।
प्रतियोगितामा विभागीय सहितका अन्य टोलीको सहभागीता रहने आयोजकले बताएको छ ।
यस प्रतियोगितामा पछिल्लो पटक किर्गिस्तानमा सम्पन्न प्रतियोगितामा सहभागी खेलाडीले भने भाग लिन पाउँने छैनन् ।
किर्गिस्तानमा भएको प्रतियोगितामा सहभागी राष्ट्रिय पुरुष टोलीका १२ सदस्यहरुले भने प्रतियोगितामा सहभागीता जनाउन पाउँने छैनन् ।
प्रतियोगितामा प्रथम हुने टोलीले २ लाख २ हजार नगद प्राप्त गर्दा दोस्रो हुनेले १ लाख १ हजार नगद प्राप्त गर्ने छ । तेस्रो हुनेले नगद रु ५० हजार ५ सय र सान्त्वनाले रु २२ हजार २ सय प्राप्त गर्ने छ ।
प्रतियोगिताको सर्वोकृष्ट खेलाडीले ८ हजार नगद पुरस्कार पाउँने छ । हरेक विधाका उत्कृष्ट खेलाडीले जनही ३ हजार नगद पुरस्कार पाउँने छ ।
प्रतियोगिताका सबै खेल नयाँ बसपार्कमा रहेको ढोरपाटन भलिबल प्रशिक्षण केन्द्रमा हुनेछ ।
