मोटरस्पोर्ट्सका जय सिंगापुर जाने

काठमाडौं । ओलम्पिक स्पोर्ट्सअन्तर्गत मोटर स्पोर्ट्स क्याटगोरीमा सहभागी हुन जयप्रताप मास्के बुधबार सिंगापुर जाने भएका छन् ।

भर्चुअल प्रतियोगिता जुन २२ देखि २५ तारिखसम्म हुनेछ ।

उनलाई राष्ट्रिय खेलकुद परिषद् (राखेप) का सदस्य–सचिव टंकलाल घिसिङ, राखेपका पूर्व उपाध्यक्ष एवं नेपाल ओलम्पिक कमिटीका उप–महासचिव पिताम्बर तिम्सिना, राखेपका सदस्य अन्जन धमाल र प्रकाश कुसारीले मंगलबार एक कार्यक्रमबीच बिदाइ गरे ।

अन्तराष्ट्रिय ओलम्पिक कमिटीको मातहतमा अन्तराष्ट्रिय इ स्पोर्ट्स फेडेरेसन तथा सिंगापुर ओलम्पिक कमिटीको आयोजनामा हुन लागेको इ स्पोर्ट्स सिरिजमा जयले सहभागीता जनाउन लागेको हुन् ।

पहिलो पटक आइओसी र इन्टरनेश्नल फेडेरेसनको झण्डामुनी सिंगापुरमा मोटरस्पोर्ट्स, साइक्लिङ, टेनिस, आर्चरी, बेसबल, चेस, डान्स, तेक्वान्दो र साइलिङ लगायत ९ खेलको इ स्पोर्ट्सको प्रतियोगिता हुन लागेको हो ।

नेपालमा मोटरस्पोर्ट्सको क्षेत्रमा काम गर्ने नासा नेपालले जयलाई सहभागी गराउन लागेको हो । प्रतियोगितामा दिप्रश शाक्य अफिसियलको रुपमा सहभागी हुने नासा नेपालले जनाएको छ ।